बालुवाटारमा प्रधानमन्त्री पुष्पकमल दाहाल ‘प्रचण्ड’, नेकपा (एमाले) अध्यक्ष केपी शर्मा ओली र नेकपा (एकीकृत समाजवादी) का अध्यक्ष माधवकुमार नेपालबीच उपनिर्वाचनबारे छलफल भएको छ।
वैशाख १५ गते हुने इलाम र बझाङको उपनिर्वाचनका विषयमा उनीहरूबीच सोमबार बिहान छलफल भएको अध्यक्ष नेपालले बताए। काभ्रेपलाञ्चोकको जिल्ला अधिवेशनमा पुगेका अध्यक्ष नेपालले उपनिर्वाचनबारे छलफल भएको कुरा सोमबार दिउँसो बताएका हुन्।
‘आज बिहान मात्रै तीन दलका नेताहरूको बैठक बसेको थियो। छलफलमा प्रधानमन्त्री प्रचण्ड, एमाले अध्यक्ष ओली र हाम्रो दलको तर्फबाट म थियौं। त्यहाँ हामीले तीन वटा पार्टीको सम्बन्धका बारेमा छलफल गर्यौं। तीन वटा अलगअलग पार्टी हुन्, अलगअलग ढंगले अगाडि बढ्छन् भन्ने कुरा आयो,’ अध्यक्ष नेपालले भने, ‘त्यसै सिलसिलामा इलाम र बझाङको कुरा आयो। हामी छुट्टै पार्टी हुनाले हामीले उम्मेदवार खडा गर्यौं भनेर एमालको तर्फबाट भनियो। स्वाभाविक रूपमा हामी पनि छुट्टै पार्टी हुनाले कहाँकहाँ उम्मेदवार खडा गर्ने हो, कसकसले हामीलाई साथ दिने हो त्यसको आधारमा हामी अगाडि बढ्ने छौं।’
अध्यक्ष नेपालले बझाङको प्रदेश सभा सदस्यको उपचुनावमा एकीकृत समाजवादीले कुनै हालतमा उम्मेदवारी दिने बताए।
‘यसबारे छिट्टै टुंगो पनि लाग्नेछ। तर हामी मानसिक रूपमा दुवै ठाउँमा उम्मेदवारी दिनुपर्ने हुनसक्छ भनेर त्यो मानसिकताका साथ अघि बढिरहेका छौं,’ उनले भने, ‘हामी बझाङमा त दिन्छौं नै त्यो हामीलाई कसैले रोक्न सक्ने कुरा भएन।’
एमालेले इलाम–२ को प्रतिनिधि सभा सदस्यको उपचुनावका लागि सुवास नेम्वाङका छोरासमेत रहेका पार्टी कानुन विभाग सदस्य सुहाङ नेम्वाङलाई उम्मेदवार बनाउने निर्णय गरेको छ।
बझाङ–१ को प्रदेश सभा उपचुनावका लागि दमनबहादुर भण्डारीलाई उम्मेदवार बनाउने निर्णय गरेको छ। आइतबार दिउँसो बसेको सचिवालय बैठकले दुवै क्षेत्रमा उम्मेदवार टुंग्याएको हो।
सत्ताको नेतृत्व गरिरहेको माओवादी केन्द्रले छलफल नै गरेको छैन। सत्तामै रहेको राष्ट्रिय स्वतन्त्र पार्टीले गठबन्धन घटकबीच सहकार्य इन्कार गर्दै चैत १७ गते उम्मेदवार घोषणा गर्ने तयारी गरेको छ। रास्वपाले उपचुनावका लागि सहमहामन्त्री कविन्द्र बुर्लाकोटीलाई इलाममै खटाएको छ।
एकीकृत समाजवादीले पनि उम्मेदवार सिफारिस प्रक्रिया अघि बढाउने जिल्ला र प्रदेशलाई निर्देशन दिएको छ।
इलाम र बझाङमा वैशाख १५ गते उपचुनाव हुँदैछ। इलाम–२ को प्रतिनिधि सभातर्फ सुवास नेम्वाङको भदौ २६ गते निधन भएपछि उपचुनाव हुन लागेको हो। बझाङको प्रदेश सभामा निर्वाचित भएका पृथ्वीबहादुर सिंहको सवारी दुर्घटनामा मृत्यु भएको थियो।
उनी सुदूरपश्चिम प्रदेशको आन्तरिक मामिलामन्त्री पनि थिए।
यो पनि: इलाम २ उपनिर्वाचन: कांग्रेस कोशीले पठायो ७ आकांक्षीका नाम
