नेकपा एमाले कास्कीको नयाँ नेतृत्व चयन गर्न उपमहासचिव पृथ्वीसुब्बा गुरूङ र स्थायी कमिटी सदस्य खगराज अधिकारी समूहको छुट्टाछुट्टै भेला भएको छ।
नयाँ नेतृत्वका लागि आ–आफ्ना प्यानल निर्वाचित गराउन प्रतिनिधिहरूको भेला राखेको दुबै समूहले बताएका छन्।
पोखराको साइमन पार्टी प्यालेसमा बिहान ११ बजे स्थायी कमिटी सदस्य खगराज अधिकारी समूहको भेला सकिएको छ। भेलामा सहभागी प्रतिनिधिलाई आफ्ना प्यानलमा मतदान गर्न आह्वान गरेको सहभागीहरूले बताएका छन्।
सोही पार्टी प्यालेसमा उपमहासचिव पृथ्वीसुब्बा गुरूङ समूहको पनि भेला भएको छ। भेलामा अधिकारी र गुरूङ भने उपस्थित छैनन्।
अधिवेशनमा पृथ्वीसुब्बा समूहले अध्यक्षमा माधव बाँस्तोला, उपाध्यक्षमा शिवप्रसाद आचार्य, सचिवमा सुरेन्द्र गुरूङ र उपसचिवमा गीता विक र राधिका योगी शाही उम्मेदवार उठाएका छन्।
खगराज समूहबाट अध्यक्षमा बैनबहादुर अधिकारी क्षेत्री, उपाध्यक्षमा भेषराज बराल, सचिवमा दर्शन लामा र उपसचिवमा लालबहादुर विक र सन्तु सुवेदी उम्मेदवार छन्।
अध्यक्षमा एमालेका युवा प्रतिनिधि विवेक त्रिपाठी र उपसचिवमा संगीता सुवेदीले उम्मेदवारी दिएका छन्। उनीहरूलाई दुबै समूहको समर्थन भने छैन।
दुबै पक्षका उम्मेदवारले आफ्नो समूहलाई विजयी गराउन व्यापक प्रचारप्रसार गरिरहेका छन्। सामाजिक सञ्जालदेखि छातीमा नेमप्लेट टाँसेर उनीहरू मत माग्दैछन्।
एमाले कास्कीको अधिवेशनमार्फत् १ सय २२ सदस्यीय जिल्ला कमिटी निर्वाचित गर्नेछ। अधिवेशनमा सहभागी हुन जिल्लाभरबाट ९ सय ३५ जना प्रतिनिधी सहभागी छन्।
शनिबार सुरू भएको अधिवेशन आइतबार नयाँ नेतृत्व चयन गरेर समापन गर्ने कार्यतालिका रहे पनि नेतृत्व चयनमा ढिलाइ भइरहेको छ।
आइतबार बन्द सत्रमा पेश गरिएको अध्यक्ष मनबहादुर गुरूङको राजनीतिक, सचिव बैनबहादुर अधिकारी क्षेत्रीको संगठनात्मक र आर्थिक विभाग प्रमुख चिरञ्जीवी पोखरेलले पेस गरेको प्रतिवेदन सोमबार पारित गरिएको छ।
सोमबार पनि नेतृत्व चयन प्रक्रिया सुरू नभएपछि मंगलबार बिहान उम्मेदवारी दर्ता र दिउँसो साढे १ बजे मतदानको कार्यतालिका प्रकाशित गरिएको थियो। कार्यतालिका अनुसार निर्वाचन प्रक्रिया सुरू नहुँदा प्रतिनिधिहरू अन्योलमा छन्।
गण्डकीको एमाले राजनीतिमा उपमहासचिव पृथ्वीसुब्बा र स्थायी कमिटी सदस्य खगराजवीच प्रतिस्पर्धा हुँदै आएको छ। यसअघि भएको प्रदेश अधिवेशनमा पनि यी दुई समूहबीच प्यानलै बनाएर निर्वाचनमा होमिएको थियो। उक्त निर्वाचनमा पृथ्वीसुब्बा गुरूङको प्यानल विजयी भएको थियो।
दुई वर्षअघि भएको कास्कीको अधिवेशनमा पनि एमालेको जिल्ला कमिटी चयन गर्न दुइटा प्यानल बनेका थिए। उक्त निर्वाचनमा अध्यक्षमा पृथ्वीसुब्बा प्यानलका मनबहाुदर गुरूङ निर्वाचित भएका थिए।
