प्रिमनसुन सुरू भएयता काठमाडौं उपत्यकासहित देशका विभिन्न भागमा वर्षा भइरहेको छ।
नेपालको मौसममा अरबियन सागरबाट उच्च जलवाष्पयुक्त वायु र स्थानीय वायुको प्रभाव देखिएको छ।
यसका अतिरिक्त पूर्वतर्फ बंगालको खाडीबाट समेत जलवाष्पयुक्त वायुको प्रभाव देखिएको बदली र वर्षा भइरहेको मौसमविद् मीनकुमार अर्यालले जानकारी दिए।
‘प्रिमनसुनको याममा स्थानीय वायुको प्रभाव हुन्छ। यसका अलावा पश्चिमी न्यूनचापीय प्रणाली र पूर्वतर्फबाट पनि जलवाष्पयुक्त वायु आइरहेको देखिन्छ,’ उनले भने, ‘यसले गर्दा पहाडी भूभागमा बदली र वर्षा भइरहेको छ। यो क्रम अझै केही दिन रहने देखिन्छ!’
मंगलबारको विवरणअनुसार पछिल्लो २४ घन्टामा ६६ वटा मध्ये ३९ वटा केन्द्रमा वर्षा मापन भएको थियो।
सबैभन्दा बढी वर्षा नवलपरासीमा ४०.५ मिलिमिटर वर्षा भएको थियो।
बुधबार बिहान लम्जुङमा मध्यम वर्षा भएको छ। पछिल्लो एक घन्टामा लम्जुङको कुन्छा केन्द्रमा ३७.४ मिलिमिटर वर्षा भएको छ।
पछिल्लो २४ घन्टामा लम्जुङदेखि पूर्वैसम्म पानी परेको छ।
लम्जुङको कुन्छामा पछिल्लो २४ घन्टामा ६०.०२ मिलिमिटर वर्षा मापन भएको छ।
सिन्धुपाल्चोकको ढुंगेमा ३३.६, सिन्धुपाल्चोककै तालामाराङ क्षेत्रमा २५.८, घुम्थाङमा ११.८ सेमार्थाङमा १३.४, सिन्धुलीको माडीमा १३.४, सिन्धुलीकै मरिणखोलामा १०.८ मिलिमिटर वर्षा मापन भएको छ।
चितवनको कालीखोलामा २०.८ मिलिमिटर वर्षा भएको छ।
बुधबार दिउँसो कोशी, बागमती र गण्डकी प्रदेशलगायत देशका पहाडी भू–भागमा साधारणतया बदली रही बाँकी भू–भागमा आंशिक बदलीदेखि मौसम मुख्यतया सफा रहने मौसम पूर्वानुमान महाशाखाले जानकारी दिएको छ।
कोशी, बागमती र गण्डकी प्रदेशका पहाडी भू–भागका केही स्थानहरूमा तथा मधेश प्रदेश र बाँकी पहाडी भू–भागका एक–दुई स्थानमा मेघगर्जन/चट्याङसहित हल्का वर्षाको सम्भावना रहेको छ।
काठमाडौं उपत्यकामा दिउँसोपख वर्षाको सम्भावना रहेको मौसमविद् अर्यालले जानकारी दिए।
कोशी, बागमती र गण्डकी प्रदेशका उच्च पहाडी तथा हिमाली भू–भागका एक–दुई स्थानमा हल्का हिमपातको सम्भावना रहेको छ।
राति देशका पहाडी भू–भागमा आंशिकदेखि साधारणतया बदली रही बाँकी भू–भागमा आंशिक बदलीदेखि मौसम मुख्यतया सफा रहने छ। कोशी, बागमती र गण्डकी प्रदेशका पहाडी भू–भागका थोरै स्थानहरूमा मेघगर्जन/चट्याङसहित हल्का वर्षाको सम्भावना रहेको छ। कोशी, बागमती र गण्डकी प्रदेशका उच्च पहाडी तथा हिमाली भू–भागका एक–दुई स्थानमा हल्का हिमपातको सम्भावना रहेको महाशाखाले नियमित बुलेटिनमा उल्लेख गरेको छ।