नेपाली कांग्रेसका सांसद दिलेन्द्रप्रसाद बडूले कांग्रेस सांसद विनोद चौधरीमाथि छानबिन भइरहेको भनेर कुन कानुनी व्यवस्थाअनुसार सभामुखलाई जानकारी गराइयो भनेर प्रश्न गरेका छन्।
बुधबार जारी राज्य व्यवस्था समितिको बैठकमा बोल्दै उनले बाँसबारी छाला जुत्ता कारखानाको १० रोपनी जग्गा प्रकरणमा कुन कानुन अनुसार उनीमाथि अनुसन्धान भइरहेको भन्दै सभामुखलाई पत्र लेखिएकोबारे प्रश्न गरेका हुन्।
सांसद पक्राउ परेपछि मात्रै सभामुख/संसदलाई जानकारी गराउने भन्ने विषय कानुनी व्यवस्था भएको उनले बताए।
‘गम्भीर प्रकृतिका फौजदारी अभियोगमा समातियो भने त्यसको जानकारी तुरून्तै संसदलाई संसद चलिरहेको बेला होस् वा नचलेको बेला होस् संसदलाई जानकारी दिने प्रबन्ध छ। संसद चलेको छैन भने सूचना पाटीमा टाँस्नुपर्छ,’ उनले भने।
तर अनुसन्धान भइरहेको विषयमा भने कुन कानुन अनुसार संसदलाई जानकारी गराइयो भन्दै सांसद बडूले प्रश्न गरेका हुन्। उनले कुनै सांसदमाथि दुर्व्यवहार गर्ने हिसाबले मात्रै यस्तो गरिएको हो कि भनेर पनि प्रश्न गरेका छन्।
यसअघि राप्रपा सांसद बुद्धिमान तामाङले पनि यस विषयमा प्रश्न गरेका थिए। बाँसबारीको जग्गा फिर्ता दिइएको हो कि सरकारले जबरजस्ती लिएको हो भन्नेबारे पनि स्पष्ट पार्न अनुरोध गरेका थिए।
विनोद चौधरीको पासपोर्टसम्म जफत गर्ने सरकारले तयारी गरिरहेको भन्ने कुरा समेत आफूहरूले सुनेको उनले समितिमा बताए।
