गृह मन्त्रालयका सचिव एकनारायण अर्यालले मेडिकल व्यवसायी दुर्गा प्रसाईंका सुरक्षागार्डलाई घरको कम्पाउण्डबाहिर आधुनिक हतियार बोकेर हिँड्ने अनुमति नरहेको बताएका छन्।
गृह सचिव अर्यालले प्रसाईंका सुरक्षागार्डबाट गत चैत ५ गते बरामद भएको आधुनिक हतियार सार्वजनिक ठाउँमा बोकेर हिँड्न नपाइने बताएका हुन्।
प्रतिनिधि सभाको राज्य व्यवस्था तथा सुशासन समितिमा बुधबार बोल्दै गृह सचिव अर्यालले भने, ‘त्यो हतियार आफ्नो घरको कम्पाउण्डबाट बाहिर निकाल्न पाइँदैन। कुनै कानुनले स्वीकृति दिँदैन।’
उनले त्यसो भनिरहँदा सांसद कृष्णगोपाल श्रेष्ठले प्रश्न सोधेका थिए। ‘सचिवज्यू, व्यक्तिको सुरक्षाका लागि त्यस्तो आधुनिक हतियार बोक्न पाइन्छ?’ जबाफमा गृहसचिव अर्यालले नपाइने बताए।
प्रसाईंका सुरक्षागार्डले सर्वोच्च अदालत परिसरमा हतियार बोकेर गएको विषयमा एमालेका सांसद रघुजी पन्तले राज्य व्यवस्था तथा सुशासन समितिको बैठकमा सोधेका थिए। सचिव अर्यालले यसबारे गृहले अनुसन्धान गर्न छुट्टै टोली बनाउन लागेको जानकारी गराएका थिए।
‘गृह मन्त्रालय सजग छ, त्यो घटना हामीले थाहा पाइसकेपछि लाइसेन्स कहाँबाट रिन्यू भयो भन्दा जिल्ला प्रशासन कार्यालय झापाबाट भएको रहेछ। तर नवीकरण एउटा ढंगबाट भएको छ, जारी अर्को ढंगले भएको प्रारम्भिक सूचना हामीलाई प्राप्त भएको छ,’ उनले भने, ‘सर्वोच्च अदालतले पनि हामीलाई हतियारको प्रयोग गर्ने विषयमा अनुसन्धान गर भनेर आदेश गरेको छ। गृहले छिट्टै अनुसन्धान टिम बनाउँछ। त्यसबारे प्रयोग गर्ने नीति पनि बनाउँछौं।’
