नेपाल प्रहरीका महानिरीक्षक (आइजिपी) बसन्तबहादुर कुँवरले सहकारी ठगी प्रकरणमा रवि लामिछानेविरूद्ध अहिलेसम्म कुनै तथ्य प्रमाण नभेटिएको बताएका छन्।
उनले बुधबार राज्य व्यवस्था तथा सुशासन समितिमा लामिछानेविरूद्ध परेको उजुरीमाथि अहिलेसम्म कुनै पनि आधार नभेटिएको बताए।
‘अहिले सहकारीको विषयमा अलिअलि सांकेतिक रूपमा आयो। ठाडो उजुरीको रूपमा इस्यू आयो दर्ता भयो। तर कुनै पनि काम अनुसन्धान गर्दा तथ्य प्रमाणमा भेटिँदैन। कानुनी दायरामा पर्ने अवस्था छैन। र अहिले त्यो जुन सांकेतिक रूपमा आएको छ रवि लामिछाने भन्ने त्यो विषयमा अहिलेसम्मको तथय प्रमाणमा कुनै पनि आधार देखिँदैन,’ उनले भने।
प्रमुख प्रतिपक्षी नेपाली कांग्रेसले सहकारी प्रकरणमा उपप्रधान तथा गृहमन्त्री लामिछाने पनि जोडिएको भन्दै संसदीय छानबिन समिति गठनको माग पनि गर्दै आएको छ।
यही विषयमा प्रष्ट पार्न जिल्ला प्रहरी कार्यालय कास्कीका प्रमुख एसपी मोहनकुमार थापालाई पनि बोलाइएको थियो।
त्यस्तै आइजी कुँवरले जिबी राई नै सहकारीको मुख्य समस्याको जड रहेको बताए। उनलाई नेपाल ल्याउन प्रहरी र परराष्ट्र मन्त्रालयमार्फत पत्राचार गरे पनि ल्याउन मलेसियन सरकार बाध्य नभएको उनको भनाइ छ। जसकारण राईलाई फिर्ता ल्याउन समस्या भइरहेको उनले बताए।
‘जिबी राईको सन्दर्भमा हामी संवेदनशील छौं। किनकी यो समस्याको मुख्य जड त्यही हो भन्ने हामीलाई लाग्छ। डिफ्युजन नोटिस जारी भयो। सुपुर्दगी गर्न पत्र पठाऊ भन्यो। हामीले परराष्ट्र मन्त्रालयमार्फत् पत्र पठायौं। त्यो अहिले इन्टेरियर मिनिस्ट्रीमा गएर बसेको छ। तर मलेसियन सरकार अहिले यति हुँदाहुँदै पनि बाध्य भएको छैन,’ उनले भने।
यद्यपि आफूले आफ्ना मलेसियाका समकक्षीसँग पहल गरिरहेको पनि उनले बताए।