नेपाल दूरसञ्चार प्राधिकरणले खरिद गरेको मोबाइल डिभाइस म्यानेजमेन्ट सिष्टम (एमडिएमएस) परामर्श सेवा खरिदमा अनियमितता भएको भन्दै १९ जना र २ वटा कम्पनीविरूद्ध भ्रष्टाचारको मुद्दा दायर भएको छ।
अख्तियार दुरूपयोग अनुसन्धान आयोगले १९ जना र २ वटा कम्पनीविरूद्ध बिहीबार विशेष अदालतमा मुद्दा दायर गरेको प्रवक्ता नरहरि घिमिरेले जानकारी दिए।
नेपाल दूरसञ्चार प्राधिकरणका तत्कालीन अध्यक्ष दिगम्बर झा, पुरुषोत्तम प्रसाद खनाल, निर्देशक/बरिष्ठ निर्देशक आनन्दराज खनाल, उपनिर्देशक/निर्देशक मिनप्रसाद अर्याल, सहायक निर्देशक/उपनिर्देशक विनोदचन्द्र श्रेष्ठ विरूद्ध मुद्दा दायर भएको हो।
त्यस्तै निर्देशक दिपेश आचार्य, उपनिर्देशक सुरेन्द्रलाल हाडा, सहायक निर्देशक/उपनिर्देशक रेवतीराम पन्थ, सहायक निर्देशक/उपनिर्देशक सन्दिप अधिकारी, सहायक निर्देशक/उपनिर्देशक सूर्यप्रसाद लामिछाने, उपनिर्देशक अच्युतानन्द मिश्र, सहायक निर्देशक विजयकुमार राय यादव, सहायक निर्देशक प्रतिक्षा पौडेल र सहायक निर्देशक निराजन कोइरालाविरूद्ध मुद्दा दायर भएको हो।
एमडिएमएस परामर्श सेवा खरिदको वार्तामा कम्पनीतर्फ संलग्न दातुक मोहम्मद नुर अमिन, दातुक मोहम्मद शिहाब, अनुज सिंह, जमिल अहमद र कबिन्द्र राज मल्लविरूद्ध मुद्दा परेको छ।
नुइमिरा नामको दुई वटा कम्पनीविरूद्ध पनि अख्तियारले मुद्दा दायर गरेको छ।
उक्त एमडिएमएस खरिद गर्दा आधार बिना बदनियतपूर्ण ढंगले अस्वभाविक बढी काम/लागत देखाएर लागत अनुमान र बोलपत्र स्वीकृत नगराई एक्सप्रेशन अफ इन्ट्रेस्ट जारी गरेको अख्तियारले जनाएको छ।
मनासिब कारण बिना लागत इष्टिमेट अस्वभाविक रूपमा बढाएर अस्वभाविक रूपमा बढी सामान बढी मूल्य तिरेर खरिद गरेको पाइएको हो।
यसरी सरकारी कागजातहरू लुकाए/नष्ट गर्ने गराउने कार्य गरेको पुष्टि भएको भन्दै अख्तियारले यस खरिद प्रक्रियामा ९१ करोड ९८ लाख ३० हजार ८८२ रुपैयाँ भ्रष्टाचार भएको दाबी गर्दै मुद्दा दायर गरेको हो। सरकारी प्रतिवादीहरूले उक्त रकमको हिनामिना गरी परामर्शदाता नुइमिरा जेभीलाई लाभ पुर्याएको उल्लेख गरेको छ।
