नेपाली कांग्रेसका नेता शेखर कोइरालाले कांग्रेसलाई एक्लै बहुमत ल्याउन सक्ने बनाउने बताएका छन्।
उनले कांग्रेसलाई एक्लै बहुमत ल्याउन सक्ने बनाउन सक्छु भन्ने आफूमा विश्वास रहेको पनि बताए।
‘एक दिन कांग्रेसलाई पुरानै अवस्थामा ल्याएर एक्लै बहुमत ल्याउन सक्ने बनाउन सक्छु भन्ने विश्वास छ,’ काठमाडौंको विशालनगरस्थित सम्पर्क कार्यालयमा बिहीबार साप्ताहिक पत्रिकाका सम्पादकहरूसँगको अन्तर्क्रियामा उनले भने।
कोइरालाले सत्ता प्राप्त हुन्छ भन्दैमा जो-सँग पनि गठबन्धन गर्न नहुने पनि बताए। ‘कांग्रेसभित्रै लोकतन्त्रको संकट देखिएको छ। राजनीतिमा निष्ठा, सिद्धान्त र आदर्श गुम्यो,’ उनले भने, ‘सिङ्गो पार्टीमा अनुशासन कायम गर्नुछ।’
उनले देशमा अस्थिरताको कारक तत्व मिश्रित निर्वाचन प्रणाली रहेको पनि बताए। समानुपातिक प्रणाली खारेज गर्नुपर्ने उनको भनाइ छ।
उनले दलहरूले जति माफी मागे पनि जनताले नपत्याउने अवस्था सिर्जना हुनु दु:खद पक्ष रहेको बताएका थिए।
‘बदनाम नै भए पनि नयाँ चाहियो भन्ने जनताको माग रहेछ भन्ने पछिल्ला घटनाले देखाउँछ,’ कोइरालाले भने, ‘प्रजातन्त्रका लागि यो कुरा खतरा हो।’
