नेपाल तरूण दलको केन्द्रीय समिति बैठकमा अध्यक्ष विद्वान गुरूङले पाँचौं महाधिवेशन एक वर्षभित्र गर्ने प्रस्ताव गरेका छन्।
उनले २०८१ चैत मसान्तभित्र महाधिवेशन गर्ने प्रस्ताव बिहीबारको केन्द्रीय समिति बैठकमा राखेको केन्द्रीय सदस्य दीपेन्द्र पोख्रेलले जानकारी दिए।
केन्द्रीय समितिमा अध्यक्ष गुरूङले महाधिवेशनका लागि प्रस्तावित कार्यतालिका नै पेस गरेका छन्।
पाँच सदस्यीय विधान मस्यौदा समिति गठन गर्ने प्रस्ताव पनि छ। केन्द्रीय समितिको अर्को बैठक आगामी जेठ २७-२८ गते गर्ने तयारी छ। जेठ ५ गतेभित्र विधानमाथि राय लिने पनि तयारी तरूण दलको छ।
आगामी साउन १५ देखि पूर्णकालीन सदस्यता वितरण, असोजभित्र वडा अधिवेशन सक्ने प्रस्तावित कार्यतालिका छ। मंसिरभित्रमा पालिका अधिवेशन र पुस तथा माघमा क्षेत्र र प्रदेश सभा अधिवेशन गर्ने तयारी छ।
माघ मसान्तभित्र ७७ जिल्ला अधिवेशन र फागुन तथा चैतमा प्रदेश र केन्द्रीय महाधिवेशन गर्ने प्रस्ताव अध्यक्ष गुरूङको छ।