नेपाली काँग्रेसका सांसद अर्जुननरसिंह केसीले सहकारी र लघुवित्तको रकम ठगी गर्नेहरुलाई सरकारले संरक्षण गरिरहेको आरोप लगाएका छन्।
शनिबार काठमाडौंमा आयोजति एक कार्यक्रमलाई सम्बोधन गर्दै उनले अहिले देशव्यापी रुपमा सहकारी र लघुवित्त ठगी खाने भाँडो भएको बताउँदै त्यसरी ठग्नेलाई सरकारले नै संरक्षण गरिरहेको बताएका हुन्।
‘अहिले देशव्यापी रुपबाट सहकारी र लघुवित्त ठगी खाने भाँडो भएको छ । राज्य त्यसलाई संरक्षण गर्ने, कारबाही भन्दा संरक्षण गर्नेतिर लागेको छ,’ उनले भने।
केसीले यस्तो परिस्थितिले आम जनतामा निराशा छाएको र विस्तारै विद्रोह र अराजकतातिर उन्मुख भइरहेको बताए।
‘निराशा र अनुन्तुष्टि बिस्तारै बिद्रोह र अराजकतातिर उन्मुख भइरहेको छ । अहिले वास्तवमा संसद संसदजस्तो चलिरहेको छैन, सरकार सरकार जस्तो चलिरहेको छैन, पार्टी, पार्टी पार्टी जस्तो चलिरहेको छैन, यो अराजकतापूर्ण स्थिति जो देशमा देखिएको छ, त्यसले बडो निराशा र अराजकताको स्थिति सिर्जना गरेको छ,’ उनले भने।
(न्युज एजेन्सी नेपालबाट)
