समाजवादी मोर्चाका संयोजक एवं नेपाल कम्युनिष्ट पार्टीका महासचिव नेत्रविक्रम चन्द ‘विप्लव’ले अहिलेका असन्तुष्टिहरूलाई नेपाली विशेषताको समाजवादबाट मात्रै समाधान गर्न सकिने बताएका छन्।
मंगलबार काठमाडौंको राष्ट्रिय सभा गृहमा आयोजित समाजवादी मोर्चाको बृहत अन्तरक्रिया कार्यक्रममा बोल्दै उनले आजका सबै समस्याको समाधान नेपाली विशेषताको समाजवादबाट मात्रै सम्भव रहेको उल्लेख गरे।
उनले गणतन्त्रबाट विभिन्न उपलब्धि प्राप्त भएपछि पूर्ण हुन नसकेको जिकिर गरे।
‘हामी समाजवादीहरू, कम्युनिष्टहरू, कतातिरबाट अघि बढ्ने, कुन धारलाई हामीले जनताको बीचमा स्थापित गर्ने? जनतालाई कसरी सुरक्षित गर्ने? यो विषयमा हाम्रो समाजवादी मोर्चाले एउटा स्पष्ट दृष्टिकोण दिएको छ की आजका सबै समस्याको समाधान नेपाली विशेषताको समाजवादबाट मात्रै सम्भव छ,’ उनले भने।
उनले समाजवादी मोर्चाले अस्थिरता ल्याउने नभई स्थिरतातिर देशलाई अघि बढाउने दाबी गरे।
‘समाजवादी मोर्चाले अस्थिरता ल्याउँछ कि भन्ने आदि इत्यादिका तर्कहरू पनि हामी सुन्ने गर्दछौं। होइन त्यो कुरा। अस्थिरतालाई स्थिरतातिर बदल्ने कुरा हामी गर्छौं,’ उनले भने, ‘आज भइरहेका असन्तुष्टिहरू, समस्याहरूलाई राजनीतिक, आर्थिक, सामाजिक कुरालाई अग्रगामी ढंगले समाधान दिनेकुरा हो।’
नेपालका कानूनी, प्रशासनिक, रोजगारी, उद्योग लगायतका क्षेत्रका समस्याहरूको पहिचान गरी समाधान गर्नेतर्फ अग्रसर हुनुपर्ने उनले बताए।
उनले आगामी दिनमा नयाँ शासन व्यवस्था, अर्थ व्यवस्थाको बहसबारे छलफल हुनुपर्ने पनि बताए।
-न्युज एजेन्सी नेपाल