सर्वोच्च अदालतका प्रस्तावित न्यायाधीश चन्द्रबहादुर सारूले सर्वोच्च अदालत संविधानको संरक्षक, मौलिक हकको रक्षक तथा संविधान र कानूनको अन्तिम व्याख्याता भएको बताएका छन्।
शुक्रबार संसदीय सुनुवाइ समितिमा आफ्नो अवधारणापत्र तथा कार्ययोजना प्रस्तुत गर्दै सारूले न्यायपालिकालाई न्यायको अन्तिम धरोहर भएको बताएका हुन्।
उनले न्यायपालिकाले आफ्नो संवैधानिक दायित्व निर्वाह गर्न स्वतन्त्र, निष्पक्ष र सक्षम हुनुपर्नेमा जोड दिए।
नेपालको संविधानको प्रस्तावनाले नै स्वतन्त्र र निष्पक्ष न्यायपालिकाको परिकल्पना गरेको उल्लेख गर्दै उनले सर्वोच्च अदालतलाई संविधानको धारा १३३ र १३७ ले महत्वपूर्ण न्यायिक अधिकार प्रदान गरेको बताए।
उनका अनुसार सर्वोच्च अदालतले संविधानसँग बाझिएका कानून बदर गर्ने, नागरिकका मौलिक हक प्रचलन गराउने, संघ, प्रदेश र स्थानीय तहबीच कानूनी विवाद निरूपण गर्ने तथा निर्वाचन सम्बन्धी विवादको निराकरण गर्ने संवैधानिक जिम्मेवारी पाएको छ।
सारूले न्यायिक जिम्मेवारी पूरा गर्न नजिर, विधिको शासन, संवैधानिकता, शक्तिपृथकीकरण, नियन्त्रण र सन्तुलन, मान्यता प्राप्त न्यायिक सिद्धान्त तथा निष्पक्ष न्यायका आधारलाई आत्मसात गर्नुपर्ने बताए।
सर्वोच्च अदालतको न्यायाधीशमा परिपक्वता, अनुभव, न्यायशीलता, क्षमाशीलता, विवेकशीलता, अध्ययनशीलता, सदाचार, नम्रता, निर्भीकता र उच्च नैतिकता हुनुपर्ने उनको भनाइ छ।
न्यायाधीश नियुक्तिका क्रममा यी गुण र योग्यताको वस्तुनिष्ठ परीक्षण हुनुपर्ने उनले बताए।
संसदीय सुनुवाइ औपचारिकतामा सीमित प्रक्रिया नभई प्रस्तावित न्यायाधीशको योग्यता, क्षमता, इमानदारी, कार्यकुशलता र निष्ठाको परीक्षण गर्ने लोकतान्त्रिक विधि भएको सारूले उल्लेख गरे।
जननिर्वाचित प्रतिनिधिमार्फत न्यायिक नियुक्तिमा सार्वजनिक जवाफदेहिता सुनिश्चित हुने उनको भनाइ छ।
आफ्नो योग्यता प्रस्तुत गर्दै उनले २०५० सालदेखि न्याय सेवामा प्रवेश गरेको र २०६३ सालमा जिल्ला न्यायाधीश बनेको जानकारी दिए।
संविधानको धारा १२९ को उपधारा ५ तथा न्याय परिषद् ऐन, २०७३ को दफा ५ ले निर्धारण गरेका आधारअनुसार आफू सर्वोच्च अदालतको न्यायाधीश पदका लागि सिफारिस भएको विश्वास व्यक्त गरे।
न्यायाधीश नियुक्तिका क्रममा समावेशिता, वरिष्ठता, अनुभव, विषयवस्तुको ज्ञान, कार्यकुशलता, इमानदारी, निष्पक्षता, पेसागत तथा नैतिक आचरण, निरीक्षण मूल्याङ्कन प्रतिवेदन र फैसलाको अनुपातलाई आधार मान्नुपर्ने उनले बताए। –न्युज एजेन्सी नेपाल
