कर्णाली प्रदेशका मुख्यमन्त्री राजकुमार शर्माले पदबाट राजीनामा दिएका छन्।
मुख्यमन्त्री शर्माले बुधबार प्रदेश सभा बैठकलाई सम्बोधन गर्दै राजीनामाको घोषणा गरेका हुन्।
उनले संघमा गठबन्धन परिवर्तन हुँदा त्यसको असर प्रदेशमा पर्ने प्रवृत्तिले संघीयता कमजोर हुने बताए।
‘केन्द्रीय सत्तामा आएको परिवर्तनले गर्दा मेरो नेतृत्वमा रहेको सरकारमा सहभागी दलले समेत फिर्ता लिएको संवैधानिक प्रक्रियाअनुरूप मैले विश्वासको मतका लागि अगाडि बढिरहेको सन्दर्भमा प्रदेश सरकारको निरन्तरता नदिने तथा विश्वासको मत समेतका लागि अनुरोध गर्न नसकिने परिस्थिति उत्पन्न भयो,’ उनले भने, ‘यसले सत्ताको खेललाई उदाङ्गो बनाएको छ, प्रदेश सरकारको स्थिरताबिना समृद्धि सम्भव छैन।’
संघमा गठबन्धन फेरबदल हुनेबित्तिकै प्रदेशमा पनि त्यसको असर पर्नु संघीयताको मर्म र भावनाविपरीत हुने उनले बताए।
‘सामन्ती एकात्मक मानसिकता राखेर गठबन्धनको नाममा सत्ताको खेल भइरहनाले, विश्वासको संकट भइरहने दलीय प्रणालीले संघीयतालाई नै कमजोर बनाउँछ। राजनीतिप्रति वितृष्णा बढाउँछ। जसका कारण देश र जनता कसैको पनि भलाइ हुँदैन। जनतामा नैराश्यता बढ्दै जान्छ। म रोष्ट्रममा आउँदै गर्दा विश्वासको मत लिने परिवेश बदलिएको छ। म अहिले विश्वासको मत लिन गइरहेको छैन। यस प्रकारको राजनीतिक परिस्थितिमा मैले कर्णाली प्रदेशको मुख्यमन्त्री पदमा रहिरहन उपयुक्त नदेखिइ आफ्नो पदबाट राजीनामा दिने निर्णय गरेको छु,’ उनले भने।
सत्ता गठबन्धनका शीर्ष नेताहरूबीच कर्णाली मुख्यमन्त्री नेकपा (एमाले) लाई दिने सहमति छ।