सुदूरपश्चिम प्रदेश सभाको बैठक स्थगित भएको छ।
बिहीबार दिउँसो तीन बजे बस्ने भनिएको बैठक अपराह्न पाँच बजेसम्मका लागि स्थगित भएको प्रदेश सभा सचिवालयले जनाएको हो।
प्रदेश सभा सचिवालयका सचिव देवबहादुर बोगटीका अनुसार सरकारको अनुरोधमा बैठक सारिएको हो।
बिहीबार सुदूरपश्चिम प्रदेशका मुख्यमन्त्री कमलबहादुर शाहले विश्वासको मत लिने कार्यतालिका तय भएको छ।
केन्द्रमा नेकपा माओवादी, नेकपा एमाले लगायतका दलबीच नयाँ गठबन्धन सहितको सरकार बनेपछि सुदूरपश्चिममा पनि त्यसको असर परेको हो।
सुदूरपश्चिम सरकारबाट नेकपा माओवादी केन्द्र र नेकपा एकीकृत समाजवादीले समर्थन फिर्ता लिएपछि मुख्यमन्त्री शाह अल्पमतमा परेका छन्।
समर्थन फिर्ता लिएको एक महिनाभित्र मुख्यमन्त्रीले विश्वासको मत लिनुपर्ने संविधानमा व्यवस्था छ।
नेपाली कांग्रेसका १८, नागरिक उन्मुक्तिका सात, राप्रपाका एक र एक स्वतन्त्र दलको समर्थन जुटाएर विश्वासको मत पाउने दाउमा मुख्यमन्त्री छन्। तर, विवादका कारण हाल नागरिक उन्मुक्ति पार्टी दुई भागमा विभाजन भएकाले मत पनि विभाजन हुने देखिएको छ।
सुदूरपश्चिम प्रदेश सरकारको विषयलाई लिएर सिंगो पार्टी नै दुई भागमा विभाजनको अवस्थामा पुगेको हो।
मुख्यमन्त्री शाहलाई विश्वासको मत दिने/नदिने विषयमा पार्टीभित्रैबाट बुधबार दुई वटा ह्विप जारी भएका छन्। ७ जना प्रदेश सभा सदस्य रहेका आफ्ना सांसदहरूलाई मतदान नगर्न नागरिक उन्मुक्ति पार्टीकी अध्यक्ष रञ्जिता श्रेष्ठले ह्विप नै जारी गरेकी छन्।
उनले लिखित रूपमै मुख्यमन्त्री शाहलाई विश्वासको मत नदिन निर्देशन दिएकी हुन्। यस्तै, पार्टी प्रमुख सचेतक खुशीराम डगौरा थारुको ह्विप जारी भएको छ।
उनले मुख्यमन्त्रीलाई विश्वासको मत दिन ह्विप जारी गरेका हुन्।
उनले अनिवार्य उपस्थिति जनाएर मुख्यमन्त्रीलाई विश्वासको मत दिन नागरिक उन्मुक्तिका सबै प्रदेश सभा सदस्यलाई निर्देशन दिएका हन्। हाल नागरिक उन्मुक्तिका ५ जना सांसद शाह नेतृत्वको सरकारमा नै सामेल छन्। यसैमा नागरिक उन्मुक्ति विभाजित छ।