नेपाली कांग्रेसका महामन्त्री गगन थापाले त्रिभुवन विश्वविद्यालयका रजिष्ट्रार र रेक्टर नियुक्ति प्रक्रियालाई अवरोध नगर्न कुलपतिसमेत रहेका प्रधानमन्त्री पुष्पकमल दाहाल 'प्रचण्ड'लाई आग्रह गरेका छन्।
उपकुलपति प्रा.डा. केशरजंग बरालले एक साताअघि नै रजिष्ट्रार र रेक्टरका लागि नाम सिफारिस गरे पनि दाहालले नियुक्ति अघि बढाएका छैनन्।
रजिष्ट्रारमा त्रिवि वातावरण विज्ञान विभागका प्राध्यापक केदार रिजाल र रेक्टरमा अन्तर्राष्ट्रिय सम्बन्धन विभागका प्राध्यापक खड्ग केसीको नाम सिफारिस भएको थियो। त्रिवि ऐनअनुसार उपकुलपतिको सिफारिसमा कुलपतिले रजिष्ट्रार र रेक्टर नियुक्ति गर्ने व्यवस्था छ। तर दलीय भागबन्डा मिलाउन प्रधानमन्त्रीले उपकुलपतिको सिफारिस कार्यान्वयन नगरेको आरोप छ।
महामन्त्री थापाले व्यवस्थापकीय कमजोरीका कारण विश्वविद्यालय दलीयकरणको दुष्चक्रमा फसेर थला परेको भन्दै त्यो कमजोरी सच्याउनेतर्फ ध्यान दिनुपर्ने पनि बताएका छन्।
‘यही सोचका साथ केही समयदेखि विश्वविद्यालयलाई दलीयकरणको दलदलबाट निकाल्ने प्रयास गर्दै आएका छौं। यसका निम्ति कालका कानून बदल्नुपर्छ,’ महामन्त्री थापाले सामाजिक सञ्जाल फेसबकुमा बिहीबार लेखेका छन्, ‘सरकारले ल्याउने उच्च शिक्षासम्बन्धी विधेयकमा संसदमा काम गर्नु पर्ने छ, गर्ने नै हो। तर ती कानून बन्नुभन्दा अगाडि विश्वविद्यालयहरूमा जति पनि नियुक्ति हुन्छन् दलीय भागबण्डाबाट मुक्त भएर गरियोस्।’
उनले उपकुलपतिले दलीय प्रभावबाट अलग रहेर प्रचलित कानून बमोजिम रेक्टर र रजिष्ट्रार लगायतका पदाधिकारी नियुक्ति अगाडि बढाउन खोजेको देख्दा केही आशा पलाएको पनि बताएका छन्।
‘तर त्यो प्रयासलाई पनि तपाईंले रोक्नुभयो भन्ने खबर छ। प्रधानमन्त्रीज्यू, फेरि यस्तो गल्ती नगर्नुहोस्। यो गल्ती सच्याउने मौका हो, विश्वविद्यालयलाई दलीय भागबण्डाको दलदलबाट निकाल्ने मौका हो, प्रक्रियालाई अवरोध होइन, कुलपतिको हैसियतले सहजिकरण गर्नुहोस्,’ थापाले भने।
यो पनि: प्रधानमन्त्रीले रोके त्रिवि रजिष्ट्रार र रेक्टर नियुक्ति
