नेकपा एकीकृत समाजवादीका सम्मानित नेता झलनाथ खनालले इलाममा आफ्नो पार्टीको उम्मेदवारले चुनाव जित्ने दाबी गरेका छन्।
इलामको प्रतिनिधि सभा क्षेत्र नम्बर २ मा एकीकृत समाजवादीका तर्फबाट जीतबहादुर राईको उम्मेदवारी दर्तापछि पत्रकारहरूसँगको कुराकानीमा नेता खनालले सबै चकित हुने गरी पार्टीले उपनिर्वाचन जित्ने बताएका हुन्।
‘इलाममा हाम्रो पार्टीले जित्दैछ, जितबहादुर, नामै छ। हामीले त्यत्तिकै उठाएका छैनौँ, उहाँसँग योग्यता पनि छ। परिणाम आएपछि धेरै चकित हुनेछन्,’ उनले भने।
नेता खनालले पार्टीले उम्मेदवार फिर्ता नगर्ने पनि बताए। बरू गठबन्धनमा रहेका अन्य दलले आफ्नो पार्टीको उम्मेदवारलाई फिर्ता गरी एकीकृत समाजवादीलाई सघाउन उनले आग्रह गरे।
‘हाम्रो उम्मेदवारी फिर्ता हुँदैन। नेकपा एकीकृत समाजवादीको उम्मेदवारलाई सबै पार्टीले सहयोग गरे इलामको विकास हुन्छ,’ उनले भने।
उनले पछिल्लोपटक विचार मिल्नेहरूबीचको गठबन्धन भएकाले लामो जाने बताए। तर तत्कालका लागि अलग अलग हिँडेर प्रतिष्पर्धाको सहमति गरेको बताए।
‘अहिले हामी अलग अलग हिँडौं, प्रतिष्पर्धा गरौं, आफ्नो आफ्नो शक्ति निर्माण गरौं, अझै ठूलो चुनौतिपूर्ण परिस्थितिमा अझै राम्रो एकता होला भन्ने हिसावले अहिले यसमै सहमति गरेका हौं,’ उनले भने।