नेपाली कांग्रेसका प्रवक्ता प्रकाशशरण महतले इलाम-२ मा यसपालिको उपनिर्वाचनमा आफ्नो पार्टीले जित्ने दाबी गरेका छन्।
शनिबार काठमाडौंमा पार्टीले आयोजना गरेको एक कार्यक्रममा महतले इलाममा अघिल्लोपटक ११४ मतको झिनो अन्तरले मात्रै हारेको स्मरण गर्दै यसपालि पार्टी एकीकृत भए उपनिर्वाचन जित्ने बताएका हुन्।
‘अगाडिको आम निर्वाचनमा अत्यन्तै झिनो मत ११४ मतले मात्रै हारेको हो । डम्बर खड्का, जिल्लाको पार्टी सभापति र तुलनात्मक रुपमा युवा उम्मेदवार हामीले दिएका छौं,’ नेता महतले भने, ‘हाम्रो पार्टी एकीकृत भएर त्यहाँ भिडने हो भने हामी निर्वाचन जित्छौं ।’
बझाङमा पनि उपचुनाव जित्न सम्भव रहेको उनले बताए।
सोही अनुसार पार्टीले जनताको पक्षमा गरेको राम्रा कामहरूको प्रचारमा जुट्न नेता कार्याकर्ताहरूलाई आग्रह गरे।
कामै नगरेकाहरूले बढाईचढाइ गरिहिँडेको बेला कांग्रेसले पनि गम्भीर भएर प्रचारमा लाग्नुपर्ने महतले बताए।
(न्युज एजेन्सी नेपालबाट)