नेपाली कांग्रेसका केन्द्रीय सदस्य नैनसिंह महरले राष्ट्रिय स्वतन्त्र पार्टी (रास्वपा) का केही नेताहरू सहकारी ठगीमा संलग्न रहेकोले छानबिन समिति गठन गर्न नदिएको आरोप लगाएका छन्।
विराटनगरमा शनिबार नेपाल विद्युत् प्राधिकरण कर्मचारी संघ केन्द्रीय परिषद भेलामा बोल्दै उनले रास्वपाका अधिकांश नेता सहकारी गठी प्रकरणमा मुछिएको दाबी गरेका थिए।
उनले उपप्रधान तथा गृहमन्त्री रवि लामिछानेप्रति लक्षित गर्दै मन्त्रिपरिषदमा विवादित व्यक्ति रहेकाले अहिलेको सरकारबाट सुशासनको अपेक्षा गर्न नहुने पनि बताए।
'विवादित व्यक्ति यतिबेला मन्त्रिमण्डलमा छन्। सहकारीमा जम्मा गरेको जनताको रकम दुरुपयोग गर्नेहरूमाथि छानबिनका लागि हामीले सडकदेखि सदनसम्म आवाज उठाइरहेका छौं। तर सरकार अटेरी गरिरहेको छ। किनकि सरकारमा प्रधानमन्त्रीभन्दा बलिया अपराधिक मानसिकता भएका व्यक्तिहरू छन्। उनीहरूले प्रधानमन्त्रीलाई विभिन्न दवाव र प्रभावमा पारिरहेका छन्,' महरले भने।
सहकारी प्रकरणमा गृहमन्त्री लामिछाने जोडिएको भन्दै कांग्रेसले संसदीय छानबिन समिति गठनको माग गरिरहेको छ।
अपराधमा संलग्न मन्त्रीहरूले आफूलाई जोगाउन चलखेल गर्ने बाहेक उनीहरूबाट अन्य कुनै अपेक्षा गर्न सक्ने ठाउँ नरहेको उनले बताए।
