नेपाली कांग्रेसका केन्द्रीय सदस्य चन्द्र भण्डारीले केपी ओलीले संसद विघटन गर्दा चुनावमा नगएर नेपाली कांग्रेसले गम्भीर गल्ती गरेको बताएका छन्।
प्रेस युनियन रूपन्देहीले आइतबार बुटवलमा गरेको पत्रकार सम्मेलनमा नेता भण्डारीले त्यतिबेला प्रतिगमन भन्दै प्रचण्ड र माधव नेपालको पछि लाग्नु कांग्रेसको गम्भीर गल्ती रहेको बताएका हुन्।
´चुनावमा जानू भनेको प्रतिगमन होइन, त्यतिबेला चुनावमा गएको भए कांग्रेस र एमालेमात्र हुन्थे प्रचण्ड र माधव नेपालको पछि लागेर प्रतिगमन भन्दै हिड्नु गलत थियो,´ उनले भने।
पत्रकार सम्मेलनमा भण्डारीले सहकारी ठगी प्रकरणमा गृहमन्त्री रवि लामिछाने लगायत नाम जोडिएका सबै नेताहरूमाथि अनुसन्धान गर्न छानबिन समिति गठन हुनुपर्ने बताए।
छानबिन समिति गठनको माग संसदीय व्यवस्थाको स्वभाविक मूल्य मान्यता भएको उनले बताए।
‘विगतमा अरुमाथि औंला उठ्याउनेहरुले आफूमाथि प्रश्न उठेपछि छानवीनका लागि तयार भएर नैतिकता देखाउनुपर्छ,’ भण्डारीले भने,‘संसदीय छानवीन समिति माग गर्नु नयां दल वा गृहमन्त्रीप्रति कुनै आग्रह पुर्वाग्रह होइन।’
नेता भण्डारीले आवश्यकता भन्दा धेरै जनप्रतिनिधि र कर्मचारी भएका कारण विकास निर्माणका लागि बजेट नपुगेको बताए।
उनले संघ र प्रदेशमा जनप्रतिनिधि र कर्मचारी संख्या आधा घटाउनुपर्ने बताएका छन्। भण्डारीले ३६ हजार जनप्रतिनिधिलाई १८ हजारमा र एक लाख कर्मचारीलाई ५० हजारमा झार्नुपर्ने तर्क गरे।
‘स्थानीय तहलाई नचलाऔं तर प्रदेश र केन्द्रको पुनःसंरचना जरुरी छ,केन्द्र र प्रदेशमा यति धेरै सांसद, मन्त्री र कर्मचारी आवश्यक छैन,’ भण्डारीले भने, ‘तलब जति जनप्रतिनिधि र कर्मचारीमा खर्च भएपछि विकास निर्माण कसरी हुन्छ ?’
संविधानले सिंहदरबारको अधिकार स्थानीय तहसम्ममा ल्याइएको, महिला, दलित, मधेशी, पछाडि पारिएका समुदायका लागि समावेशी समानुपातिक सहभागिता सुनिश्चित भएको तर नागरिकको अवस्थामा परिवर्तन नहुदा र रोजगारीका लागि विदेश पलायनले आमरुपमा जनतामा निराशा छाएको बताए। समानुपातिक प्रणालीले नेताहरुले मात्र फाइदा लिएर बलिया भएकाले समानुपातिकमा विज्ञहरु मात्र लैजानुपर्ने उनले बताए।
पत्रकारको जिज्ञासामा नेता भण्डारीले अबको महाधिवेशनमा आफू पार्टी सभापति पदमा उम्मेदवार हुने बताए। अहिलेका सभापति शेरबहादु देउवा विधानको व्यवस्थाका कारण पनि नेतृत्वबाट बिदा लिने बताए।
