नेपाली कांग्रेसका केन्द्रीय सदस्य प्रदीप पौडेलले सहकारी प्रकरणमा संसदीय छानबिन समिति गठन गर्ने अडानबाट पार्टी पछि नहट्ने बताएका छन्।
उपप्रधान तथा गृहमन्त्री रवि लामिछाने सहकारी प्रकरणमा जोडिएको भन्दै प्रमुख प्रतिपक्षी कांग्रेसले संसदीय छानबिन समिति गठनको माग गर्दै आएको छ।
सांसदसमेत रहेका पौडेलले संसदीय छानबिन समिति गठनको मागबाट पार्टी पछि नहट्ने बताए।
‘कुनै पनि घटनाको सत्यतथ्य के हो भन्ने कुरा खोजिनुपर्छ, आरोप लाग्दैमा कोही दोषी हुन्छ भन्ने पनि होइन। तर आरोप लागेपछि त्यसको छानबिन गर्ने र सत्यतथ्य बाहिर ल्याउने काम सरकारको हो,’ नयाँ वर्षका अवसरमा काठमाडौंमा सोमबार आयोजित शुभकामना आदानप्रदान कार्यक्रममा पौडेलले भने।
आफूमाथि प्रश्न उठ्दा वास्ता नगर्ने र अरूलाई मात्र प्रश्न उठाउने गर्दा सुशासनको मान्यतालाई सरकारले अंगीकार गरेको नहुने उनको भनाइ छ। उनले भ्रष्टाचारका सबै काण्डहरूबारे छानबिन हुनुपर्ने बताए। निष्पक्ष रूपमा छानबिन गर्न सक्ने समिति बनाउनुपर्ने पनि उनको भनाइ थियो।
‘सहकारीको विषय केही तथ्यहरुसँग जोडिएको छ। हामीले छानबिन प्रभावित हुने स्थिति भएको कारणले संसदीय समिति बनाउनुपर्छ भनेको हो,’ उनले भने, ‘समिति बनाउँदा सत्ताको अंक गणितको आधारमा हुन्छ। सत्तारुढ गठबन्धनले संसदीय समिति बनाउँदा र सत्तामै भएको व्यक्तिमाथि छानबिन गर्दा पनि संसदीय समितिको बहुमत त्यही गठबन्धनकै हुन्छ। संयोजक पनि त्यही पक्षबाट आउनुहुन्छ। कांग्रेसबाट गएका केही प्रतिनिधिले सत्यलाई ढाकछोप गर्ने स्थिति हुँदैन, त्यसैले छानबिनका लागि निर्दोष छु भन्नेहरु किन तयार नहुनुभएको? निर्दोष भए त झनै छानबिन गरेर निर्दोष सावित हुनु राम्रो हुन्छ।’
उनले कांग्रेस संसदीय छानबिन समिति निर्माण गरिनुपर्ने अडानबाट पछि नहटेको उनले बताए। ‘दोषी नभएको अवस्थामा छानबिन समिति बनाउन किन अफ्ठ्यारो भयो? हामीले पूर्वाग्रह राखेको होइन, नयाँ कुरा गरेको होइन। कांग्रेस छानबिन समिति निर्माण गर्ने अडानबाट पछि हटेको छैन, हट्दैन,’ उनले भने।
सरकारको संयन्त्र विश्वसनीय नभएकै कारण यसअघिका प्रकरणमा पनि संसदीय छानबिन समितिहरू बन्ने गरेको उनले बताए।
(न्युज एजेन्सी नेपाल)
