राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले उपप्रधानमन्त्रीसमेत रहेका गृहमन्त्री रवि लामिछानेले सहकारी प्रकरणमा छानबिनका लागि बाटो खोल्नुपर्ने बताएका छन्।
राप्रपाले मंगलबार काठमाडौंमा गरेको प्रदर्शनपछिको कोण सभामा बोल्दै लिङ्देनले सहकारी प्रकरणमा लामिछानेमाथि प्रश्न उठेकोले छानबिनका लागि बाटो खोल्नुपर्ने बताए।
‘सुशासनको कुरा अरूलाई मात्र लागू हुने तपाईंलाई लागू नहुने भन्ने कुरा हुन्न गृहमन्त्रीजी, सहकारीको विषयमा देशले प्रश्न उठाइराखेको छ, तपाईंले सफाइ दिनु पर्दैन?,’ लिङ्देनले भने, ‘तपाईंले छानबिनका लागि बाटो खोल्नु पर्दैन? छानबिन गराउनुस्। छानबिन गर्दा तपाईं दोषी देखिनु भएन भने ठिक छ। तर गृहमन्त्री रवि लामिछानेलाई छानबिन नै नहुनुपर्ने कुन त्यस्तो व्यवस्था हो?’
सुशासनको कुरा गर्ने लामिछानेमाथि नै प्रश्न उठेको उनले बताए। ‘आज यस्तै यस्तै मानिसहरू एकले अर्कालाई सहयोग गर्न र आफ्नो कुकर्म ढाकछोप गर्न सत्ता गठबन्धन गरेर बसिरहेका छन्,’ लिङ्देनले भने, ‘यसप्रकारको गठबन्धन र शासकीय प्रणाली देशले कति दिन धान्न सक्छ?’
उनले प्रदर्शनमा प्रहरीले दमन गरेको पनि बताए। प्रहरी दमनबाट ३० जनाभन्दा बढी घाइते भएको र उनीहरूको उपचार पार्टीले नै गर्ने उनले बताए।
गणतन्त्र र भ्रष्ट व्यवस्थाको विरूद्ध प्रदर्शन गरिएको उनको भनाइ थियो।
-ink-1712650247-1712654673.jpeg)
-1746009348.jpg)
