सत्तारूढ नेकपा (माओवादी केन्द्र)का सांसद माधव सापकोटाले गृहमन्त्री रवि लामिछानेबारे राज्यका निकायहरूले दिएको तथ्य र प्रमाणका आधारमै प्रधानमन्त्रीले संसदलाई जवाफ दिएको बताएका छन्।
प्रतिनिधि सभाको बुधबारको बैठकमा बोल्दै सांसद सापकोटाले रवि लामिछाने र सहकारी ठगीको विषयमा प्रधानमन्त्रीले यसअघि नै सदनमा जवाफ दिएको र सो जवाफ तथ्य र प्रमाणहरूका आधारमा प्रस्तुत भएको समेत बताएका हुन्।
‘प्रधानमन्त्री ज्यूले फैसला गर्नुभएको होइन। राज्यका संयन्त्रहरूले दिएको तथ्य प्रमाणहरूका आधारमा संसदमा प्रस्तुत गर्नुभएको हो। तपाईंलाई चित्त नबुझ्न सक्छ त्यसप्रति सम्मान नै छ,’ उनले भने।
सहकारी ठगीमा उपप्रधानमन्त्री तथा गृहमन्त्री रवि लामिछानेको संलग्नाबारे प्रमुख प्रतिक्षी दल नेपाली कांग्रेसले प्रधानमन्त्रीसँग जवाफ माग गरेको थियो।
संसदमा उपस्थित भएर जवाफ दिने क्रममा प्रधानमन्त्री प्रचण्डले सहकारी ठगी प्रकरणमा गृहमन्त्री लामिछानेको संलग्नता नरहेको बताएका थिए।
हजारौं जनता ठगिएको, त्यसमा छानबिन गर्ने निकायको प्रमुख नै संलग्न रहेको र प्रधानमन्त्री नै त्यस्ता व्यक्तिहरूको संरक्षणमा उत्रिएको भन्दै कांग्रेसले संसदीय छानबिन समिति बनाउन माग गरिरहेको छ।
कांग्रेसले संसदीय छानबिन समिति नबनेसम्म संसद चल्न नसक्ने बताउँदै आएको छ।
तर सत्तापक्ष दलहरूले भने कांग्रेसले यसलाई व्यक्ति विशेषको रूपमा लिएको आरोप लगाएको छ।
‘अमूक रूपमा व्यक्ति विशेषलाई खुइल्याउने र तत्काल रियाक्टको विषय बनाउने भन्दापनि हामी जिम्मेवार ढंगले प्रस्तुत होऔं,’ बुधबारको संसद बैठकमा सापकोटाले भने।
उनले सहकरी पीडितले न्याय पाउनुपर्छ भन्ने पक्षमा रहको तर संसदलाई बन्धक नबनाई त्यसमा अगाडि बढ्नुपर्ने बताए।
‘न्याय पाउनुपर्छ भनेर अहिले तत्काल रियाक्ट गर्ने। सत्ताको दाउपेचको बहस र मन्थनको विषय संसदलाई बनाइदिनुहुँदैन,’ उनले भने।
-1746009348.jpg)
