नेपाली कांग्रेसका केन्द्रीय सदस्य नैनसिंह महरले लोकतन्त्रमाथि पछिल्लो समय अराजक तत्वहरूले धावा बोल्न खोजेको बताएका छन्।
जनताको त्याग, बलिदान र संघर्षबाट आएको लोकतन्त्रप्रति केही तत्वहरूले धावा बोल्न खोजेको उनको दाबी थियो।
जनसम्पर्क समितिहरूसँग उपनिर्वाचन तयारीबारे बिहीबार छलफल गर्दै उनले लोकतन्त्रले आफ्नो लय समात्न नसकोस् भन्ने चाहना भएका राजनीतिक दलहरूले पद्धति र सैद्धान्तिक पक्षमाथि धावा बोल्ने काम गरेको बताएका हुन्।
'२००७ सालपछिको ठूलो संघर्षबाट कांग्रेसले लोकतन्त्र ल्याएर मुलुकलाई अहिलेको स्थानमा पुर्याएको हो। आफ्नो लय समात्न नपाउने गरी लोकतन्त्रका पद्धति र सैद्धान्तिक आभारमाथि धावा बोल्ने काम भइरहेको छ, अब लोकतन्त्रप्रेमी जनता र कांग्रेसका लागि यो स्वीकार्य हुँदैन,' महरले भने।
जनताले आफैंले स्थापित गरेको लोकतान्त्रिक प्रणालीको संस्थागत विकास गर्न अब जनता स्वयम् लड्ने बेला आएको उनले बताए। त्यसका लागि आसन्न उपनिर्वाचनमा कांग्रेसका उम्मेदवारहरूलाई विजयी गराएर लोकतन्त्र विरोधीहरूलाई परास्त गर्नुपर्ने उनको भनाइ थियो।
'जनताले आफैंले लडेर स्थापना गरेको लोकतन्त्रलाई बलियो पार्न उपनिर्वाचनमा जनता कांग्रेसको पक्षमा उभिनु पर्ने बेला आइसकेको छ। जनताको साथ लोकतन्त्र र कांग्रेसलाई रहने छ भन्नेमा हामी विश्वस्त छौं,' उनले भने।
नयाँ आएका राजनीतिक दलको पनि परिस्थिति र चरित्र हेर्दा उनीहरू लोकतन्त्रप्रति प्रतिबद्ध नदेखिएको महरको आरोप छ।
उनले गृहमन्त्री रवि लामिछानेमाथि मात्र नभएर २०४७ सालयताका सबै उच्च पदस्थ व्यक्तिहरूमाथि छानबिन हुनुपर्छ भन्ने पक्षमा कांग्रेस रहेको बताए।
तर सरकारमै रहेकाहरूले सुशासनको खिल्ली उडाएर खुट्टा कमाइरहेको उनको आरोप थियो।
