नेपाली कांग्रेसका सभापति शेरबहादुर देउवाले अहिलेको व्यवस्थामा कमजोरी छन् भने सुधार गर्ने ठाउँ रहेको बताएका छन्।
उनले राजतन्त्र फर्किने सम्भावना नरहेको पनि बताए।
सूर्यबहादुर थापाको नवौं स्मृतिमा सूर्यबहादुर थापा प्रतिष्ठानले आइतबार काठमाडौंमा गरेको कार्यक्रममा बोल्दै सभापति देउवाले भने, ‘नेपालमा गणतन्त्र आएको छ। यद्यपि फेरि राजा फर्काउन पर्यो भनेर मान्छेहरू हिँडिरहेका छन्। राजतन्त्र फर्किन्छ भन्ने मलाई लाग्दैन। अहिलेकै व्यवस्था सर्वस्वीकार्य बनाएर लैजाऔं।’
उनले अहिलेका व्यवस्थामा केही कमजोरी छन् भने सुधार गर्ने ठाउँ रहेको बताए। तर सुधार गर्न दुई तिहाइ मत चाहिने उनको भनाइ छ।
‘केही कमजोरी छन् भने सुधार्ने ठाउँ छन्। राजा फर्काउने कुरा असम्भव देख्छु,’ उनले भने, ‘बहुदलीय व्यवस्थाको सुदृढीकरणको आवश्यकता छ।’
सूर्यबहादुर थापाले अहिलेको व्यवस्था ल्याउन योगदान गरेको पनि देउवाको भनाइ छ। ‘बहुदलीय व्यवस्थामा पनि उहाँ प्रधानमन्त्री बन्नुभयो,’ उनले भने।
