सुदूरपश्चिम प्रदेशको मुख्यमन्त्रीमा दाबी पेस गर्ने तयारीमा नेपाली कांग्रेस, नागरिक उन्मुक्ति पार्टी र नेकपा (एकीकृत समाजवादी) जुटेका छन्।
कांग्रेस प्रमुख सचेतक विक्रमसिंह धामीले तीन दल मिलेर सरकारमा दाबी पेस गर्न लागिएको बताए।
‘कांग्रेस, नाउपा र एकीकृत समाजवादी भएर सरकारमा दाबी गर्छौं,’ धामीले सेतोपाटीसँग भने, ‘प्रदेश प्रमुखज्यूको समय लिइसकिएको छ। हामी छलफल गर्दैछौं। नाउपालाई मुख्यमन्त्री दिने हो।’
नाउपा सांसद लक्ष्मणकिशोर चौधरीलाई मुख्यमन्त्री बनाइने उनको भनाइ छ। उनी नाउपाभित्र संरक्षक रेशम चौधरीनिकट छन्। कांग्रेस प्रमुख सचेतक धामीले सरकार बनाउन बहुमत पुर्याउने दाबी गरेका छन्।
नाउपा अध्यक्ष रञ्जिता पक्षले पनि आइतबार बालुवाटारमा सत्ता गठबन्धनका शीर्ष नेताहरूसँग छलफल गरेकी थिइन्। प्रधानमन्त्रीसहित भएको छलफलमा सुदूरपश्चिम मुख्यमन्त्री नाउपाले लिने सहमति भएको थियो।
अध्यक्ष श्रेष्ठले कैलाश चौधरीलाई नाउपा संसदीय दलको नेता तोक्दै उनैलाई मुख्यमन्त्रीमा अघि सारेकी छिन् भने संरक्षक रेशम पक्षले भने लक्ष्मणकिशोरलाई मुख्यमन्त्री बनाउनुपर्ने बताइरहेका छन्।
५३ सदस्यीय सुदूरपश्चिम प्रदेश सभामा सरकार बनाउन २७ सांसदको समर्थन आवश्यक पर्छ।
नेपाली कांग्रेसका १८ जना सांसद छन्। माओवादी केन्द्रसँग सभामुखसहित ११, नेकपा (एमाले) सँग उपसभामुखसहित १०, नाउपासँग सात, एकीकृत समाजवादीसँग चार सांसद छन्। स्वतन्त्र सांसद तारा जोशीले भने अहिलेसम्म निर्णय गरिसकेका छैनन्।
एकीकृत समाजवादीका सांसद नरेश शाहीले संघको सत्ता गठबन्धनमा भएको सहमतिअनुसार अघि बढ्न निर्देशन आएको बताए। ‘नेताहरूले संघकै सहमतिअनुसार अघि बढ्नुस् भन्नु भएको छ। तर यहाँको परिस्थिति नयाँ गठबन्धन बनाएर गए पनि हुन्छ भन्ने खालको छ,’ उनले भने।
एकीकृत समाजवादीका उपाध्यक्ष राजेन्द्र पाण्डेले बालुवाटारमा आइतबार बिहान भएको छलफलमा कुरा नमिलेकोले सुदूरपश्चिममा नयाँ गठबन्धन बन्न सक्ने बताए।
‘आज बिहान बालुवाटारमा छलफल भएको थियो, कुरा मिलेन,’ उनले भने, ‘सुदूरपश्चिममा कांग्रेससहित नयाँ गठबन्धन बन्न पनि सक्छ।’
सत्ता गठबन्धन बैठकमा अध्यक्ष माधवकुमार नेपालले सुदूरपश्चिम मुख्यमन्त्री एकीकृत समाजवादीलाई चाहिने बताएका थिए। तर गठबन्धनका अरू दलका नेताहरूले भने आलोपालोअनुसार पहिले नाउपा र पछि एकीकृत समाजवादी मुख्यमन्त्री दिन सकिने बताएका थिए।
