प्रधानमन्त्री पुष्पकमल दाहालले हौसिएर कम्युनिष्ट एकता गर्ने पक्षमा आफूहरु नरहेको बताएका छन्।
नेकपा स्थापनाको ७५ औं वर्ष प्रवेशको अवसरमा सोमबार गोदावरीमा नेकपा (एमाले)ले गरेको हीरक महोत्सवमा बोल्दै प्रधानमन्त्री प्रचण्डले अघिल्लो पटकजसरी हतार र हौसिएर पार्टी एकता गरिहाल्ने पक्षमा नरहेको बताएका हुन्।
‘हामी त्यो बेलामा अलि बढी हौसिएछौं कि, समय भन्दा अगाडि नै दौडिइएछ कि भन्ने हेक्का राख्नुपर्ने ठान्छु मैले । त्यसकारण अहिले हामी सहकार्य सुरू गरेका छौं, राम्रो सहकार्य गरौं । यसबाट जनतालाई र देशलाई राम्रो सेवा दिउँ,’ उनले भने।
त्यसो हुँदै जाँदा दलहरूबीच स्वतः एकता र समझदारीको आधारभूमी तयार हुने प्रधानमन्त्री प्रचण्डले बताए।
संविधान कार्यान्वयन, संघीय लोकतान्त्रिक गणतन्त्र सुदृढिकरण र समाजवादको आधार तयार पार्ने कुरामा जुन बिन्दुमा पुगिएको छ त्यसमा इमान्दार भएर लाग्नु नै मुख्य आवश्यकता रहेको प्रधानमन्त्री प्रचण्डले बताए।
तर, जुन जुन बेला कम्युनिष्ट शक्तिहरूबीच एकता भएका छन् ती बेला ठूलो सफलता प्राप्त भएको पनि प्रधानमन्त्री प्रचण्डले बताए।
‘अहिले पनि एकतावद्ध हुने हो भने देशको एक नम्बर शक्ति बन्ने र समाजवादतिर देशलाई डोहोर्याउन सक्ने सम्भावना प्रबल छ, हामी सबै त्यतातिर चिन्तन मनन गरौं,’ उनले भने।
