प्रधानमन्त्री पुष्पकमल दाहाल ‘प्रचण्ड’ले एमाले अध्यक्ष केपी शर्मा ओलीलाई आफूले विश्वास गर्न चाहेको बताएका छन्।
नेकपा स्थापनाको ७५ औं वर्ष प्रवेशको अवसरमा सोमबार गोदावरीमा नेकपा (एमाले)ले गरेको हीरक महोत्सवमा बोल्ने क्रममा प्रधानमन्त्री प्रचण्डले तीन पटकसम्म आफू ओलीलाई विश्वास गर्न चाहेको बताएका हुन्।
उनले सम्बोधनको सुरूवातमै आफू ओलीलाई विश्वास गर्न चाहेको बताए।
‘क्याबिनेट बैठक अलिकति लम्बियो। जसले गर्दा म समयमा आउन पाइनँ। यहाँ जुन भिडिओ क्लिप प्रस्तुत भयो, सबै त मैले हेर्न पाइनँ। अन्तिम अन्तिममा मात्रै ७५ वर्षको समीक्षात्मक रिपोर्ट भनौं। या भिडिओ हेरेँ। म त्यहाँ अगाडि बस्दा कमरेड केपी ओलीले क्लिपमा त्यस्तो नकारात्मक टिप्पणी खासै गरिएको छैन भन्नुभयो,’ प्रधानमन्त्री प्रचण्डले भने, ‘म केपीजीलाई विश्वास गर्न चाहन्छु।'
सम्बोधनका क्रममा प्रधानमन्त्री प्रचण्डले कम्युनिष्टहरूको सहकार्यमा देशमा ठूला ठूला परिवर्तन आएको बताए।
कम्युनिष्टहरू मिल्दा ठुल्ठूला सफलता हासिल गरेको र नमिल्दा नोक्सान भएको बारेमा पनि स्मरण गरे।
नेकपा एकता र विग्रहको समीक्षासहितको सम्बोधनको अन्तिममा उनले पुनः आफू ओलीलाई विश्वास गर्न चाहेको बताए।
‘कमरेड केपी ओलीलाई म विश्वास गर्न चाहन्छु, हामी हिजो विश्वास र अविश्वासको निकै ठूलो चक्रबाट गुज्रेका छौं,’ म विश्वास गर्न चाहन्छु,’ उनले भने।
प्रधानमन्त्री प्रचण्डले नयाँ प्रक्रियाबाट अगाडि बढ्नका लागि अपिल समेत गरे।
