पोखरामा रहेका विभिन्न ६ वटा सहकारी पीडितले सोमबार पोखरामा प्रदर्शन गरेका छन्।
सर्वसाधारणले बचत राखेको रकम हिनामिना गर्ने विभिन्न ६ वटा सहकारी संस्थाका बचतकर्ताले पहिलो चरणका आन्दोलनस्वरूप प्रदर्शन गरेका हुन्।
पोखराको गैह्रापाटनमा भेला भएका सहकारी पीडितले पोखरा महानगरका मेयर धनराज आचार्य, कास्कीका सिडिओ वासुदेव घिमिरे र प्रहरी प्रमुख एसपी मोहन थापालाई ज्ञापनपत्र समेत बुझाएको कास्की सहकारी बचत पीडित संघर्ष समितिका संयोजक किरण श्रेष्ठले बताए।
‘हामीले सडकमै बोलाएर मेयर, सिडिओ र एसपीलाई बोलाएर ज्ञापनपत्र बुझायौं छौं,’ उनले भने, ‘अब पनि हाम्रो बचत फिर्ता हुँदैन भने कडा स्वरूपमा आन्दोलनमा उत्रनेछौं।’
सहरकारीमा राखेको बचत अपचलन भएको २ वर्षभन्दा बढी समय बित्दासमेत सरकार र सम्बन्धित निकायले चासो नदिएको उनले बताए।
बचतकर्ताले आफ्नो बचत रकम फिर्ता नपाउँदा औषधीसमेत खान नपाएको भन्दै उनले तत्काल सञ्चालकको सम्पत्ति बिक्री गरेर भए पनि बचत फिर्ता दिन माग गरे।
प्रदर्शनमा सहभागीले पीडितहरूलाई न्याय दे, सहकारी ठगलाई राजनीतिक संरक्षण, कसले गर्छ हाम्रो बचतको सुरक्षण, फरार प्रतिवादीलाई तुरून्त पक्राउ गर, सहकारी पीडितमाथि राजनीति बन्द गर लगायत नारा लेखिएको प्लाकार्ड बोकेका थिए।
प्रदर्शनपश्चात आयोजित कोण सभामा बोल्दै संघर्ष समितिका संयोजक श्रेष्ठले पीडितलाई न्याय नपाउँदासम्म आन्दोलन नरोकिने चेतावनी दिए।
‘हाम्रो आन्दोलन अब रोकिँदैन, सरकारले सुनेन भने हामी कठोर भएर अघि बढ्छौं,’ उनले भने, ‘पीडितले न्याय पाउन पोखरा बन्द नै गर्नुपर्ने हो?’
बन्द, हड्ताल जस्ता गतिविधि गर्ने आफूहरूको चाहना नभए पनि सरकारले सुनेन भने बन्द, हड्तालका कार्यक्रम पनि ल्याउने उनले बताए।
कोण सभामा बोल्दै इमेज सहकारीका पीडित हरिबहादुर खत्री, मित्रमिलन सहकारीका पीडित प्रकाश पौडेल, बलिदानी सहकारीका पीडित सुनिल चौलागाईं लगायतले मन्तव्य राख्दै पीडितलाई न्याय दिलाउनभन्दा अभियुक्तलाई संरक्षण गर्नतर्फ सरकार लागेको आरोप लगाए।
उनीहरूले अदालतले पनि सहकारीको रकम अपचलन गरेका कतिपय अभियुक्तलाई सामान्य धरौटीमा छाडेको भन्दै असन्तुष्टि जनाए।
आन्दोलनमा पोखरामा स्थापना भएर सर्वसाधारणको रकम अपचलन भएका सूर्यदर्शन सहकारी, इमेज सहकारी, शिव शिखर सहकारी, मित्रमिलन सहकारी र बलिदानी सहकारीका पीडितहरू सहभागी थिए।
पीडितहरूले यसअघि प्रधानमन्त्री प्रचण्ड, कांग्रेस सभापति शेरबहादुर देउवा, एमाले अध्यक्ष केपी ओली, गृहमन्त्री एवं राष्ट्रिय स्वतन्त्र पार्टीका सभापति रवि लामिछाने लगायतलाई ज्ञापनपत्र बुझाइसकेका छन्।
सहकारी पीडितका समस्या समाधान गर्न कोही पनि जिम्मेवार नभएकाले आन्दोलनमा उत्रनुपरेको पीडितहरूले बताएका छन्।