सुनको अवैध पैठारी (तस्करी) नियन्त्रण सम्बन्धी जाँचबुझ आयोगले प्रहरी र कर्मचारीहरूलाई कारबाहीका लागि सिफारिस गरिएको सम्बन्धमा कार्यान्वयन गर्न बनेको समितिले प्रतिवेदन बुझाएको छ।
प्रतिवेदनको कार्यान्वयन गर्न उपप्रधान एवं गृहमन्त्री रवि लामिछानेले गृह मन्त्रालय कानुन शाखाका प्रमुख सहसचिव भरतमणि रिजालको संयोजकत्वमा समिति बनेको थियो।
समितिले सोमबार नै गृह मन्त्रालयमा प्रतिवेदन बुझाएको सहसचिव रिजालले जानकारी दिए।
जाँचबुझ आयोगको प्रतिवेदनले सुन प्रकरणको छानबिन गर्न केन्द्रीय अनुसन्धान ब्युरो (सिआइबी) का तत्कालीन प्रमुख एआइजी किरण बज्राचार्यसहित चार प्रहरी कर्मचारीले असहयोग गरेको भन्दै विभागीय कारबाहीका लागि सिफारिस गरेको थियो। त्यसपछि जिल्ला प्रहरी कार्यालय नुवाकोटबाट एसपी सञ्जयसिंह थापा र डिएसपी दुर्गा दाहाल, डिएसपी रूगम कुँवरलाई सिआइबीबाट हटाइएको थियो।
यस्तै, भन्सारका कर्मचारी र २ जना सरकारी वकिललाई पनि आयोगले कारबाहीका लागि सिफारिस गरेको थियो।
कारबाही सिफारिस गरेपनि उनीहरूमाथि केकस्तो कारबाही गर्ने भन्नेबारे निर्णय तथा सुझावका लागि गृहले उक्त समिति बनाएको थियो। समितिले गरेको सिफारिस अनुसार नै कार्यान्वयन गर्ने उपप्रधान एवं गृहमन्त्री रवि लामिछानेले बताउँदै आएका छन्।
समिति निकट स्रोतका अनुसार आयोगको प्रतिवेदनमा लगाइएको आरोपका आधारमा दोषी भनिएकाहरूलाई कारबाही गर्ने कानुनी आधार नभएको र आचारण सम्बन्धी विषय उठाइएको छ।
‘आयोगको प्रतिवेदनमा डिजिटल फरेन्सिक ल्याबको रिपोर्ट उपलब्ध नगराएको, मातहतका अनुसन्धान अधिकृतले बयान गराएर छोडेको कुरा जानकारीमा नराखेको र अनुसन्धान अधिकृतलाई भ्रममा राखेको जस्ता आरोप बज्राचार्यलाई लगाइएको छ,’ प्रतिवेदन कार्यान्वयनबारे अध्ययन गर्न बनेको समिति निकट स्रोतले भन्यो, ‘प्रतिवेदनले विभागीय कारबाही गर्न सिफारिस गरे पनि उनीहरूलाई गर्ने कारबाहीको आधार कमजोर छ। सहयोग गरेनन् भन्ने विषयको प्रमाण पनि हुँदैन।’
स्रोतका अनुसार, आयोगले पनि ठ्याक्कै यही कारबाही गर्नू नभनेकाले समिति आयोगको प्रतिवेदनमाथि नगएको हो।
गत चैत १ गते सुन तस्करी सम्बन्धी जाँचबुझ आयोगको प्रतिवेदन पढिसकेपछि उपप्रधान तथा गृहमन्त्री रवि लामिछानेले यसको छानबिनमै शंका देखिएकाले फेरि छानबिन गर्ने बताउँदै आएका थिए।
उनले आयोगले दोषी देखाएकाहरूलाई कारबाही गर्ने र आयोगका सुझाव कार्यान्वयन गर्ने प्रतिबद्धता पनि जनाएका थिए।
यो पनि: