उपप्रधान तथा गृहमन्त्री रवि लामिछानेले प्रतिनिधि सभा बैठकमा बोलेका छन्।
आफूमाथि लागेका आरोपबारे गृहमन्त्री लामिछानेले आइतबार अपराह्नको प्रतिनिधि सभा बैठकमा जबाफ दिएका हुन्।
उनले आफूले सहकारीको बचत अपचलन नगरेको बताएका छन्। संसदीय छानबिन समिति गठनका लागि आफूहरू तयार भएको तर व्यक्ति केन्द्रित समिति बनाउने कि नबनाउने सोच्न उनले प्रमुख प्रतिपक्षी कांग्रेसलाई आग्रह गरेका छन्।
गृहमन्त्री लामिछाने बोलेर सकेपछि प्रमुख प्रतिपक्षी नेपाली कांग्रेसका सांसदहरू बसेको ठाउँबाट उठेका थिए। बोल्न पाउनुपर्ने उनीहरूको माग थियो।
तर सभामुख घिमिरेले आज शुन्य समयलगायत कार्यक्रम कार्यसूचीबाट हटाइएको जानकारी गराएका थिए।
सभामुख घिमिरेले सोमबार बिहान ११ बजेसम्मका लागि बैठक स्थगित गरेका छन्।
यसैबीच प्रमुख प्रतिपक्षी नेपाली कांग्रेसका महामन्त्री गगन थापाले पत्रकार सम्मेलन गर्ने भएका छन्।
संघीय संसद भवनको ल्होत्से हलमा थापाले आइतबार बेलुकी ७:३० बजे पत्रकार सम्मेलन राखेका हुन्।
गृहमन्त्री लामिछानेले प्रतिनिधि सभामा बोल्दा कांग्रेसका महामन्त्री थापालाई लक्षित गर्दै अभिव्यक्ति दिएका थिए।
प्रतिनिधि सभा बैठक सुरू हुनुअघि कांग्रेसका सांसदहरूले सभामुखलाई भेटेर गृहमन्त्रीले बोलेपछि कांग्रेसले बोल्न समय पाउनुपर्ने माग गरेका थिए।
सांसद रामहरि खतिवडाले गृहमन्त्रीले बोलेपछि कांग्रेसलाई बोल्न समय दिन सभामुखसँग माग गरिएको बताएका थिए।
सभामुख घिमिरेका प्रेस विज्ञ शेखर अधिकारीले आजको बैठकमा सभामुखले कांग्रेसलाई बोल्न नरोकेको बताए।
‘कानून मन्त्री पदम गिरी, प्रमुख विपक्षी दलका प्रमुख सचेतक रमेश लेखकसहित बसेको प्रमुख दलका मुख्य/प्रमुख सचेतकबीच नै आज गृहमन्त्रीलाई मात्रै बोल्न दिने सहमति भएको थियो,’ उनले भने, ‘सँगसँगै सभामुखले पनि कांग्रेसले उभिएर विरोध जनाएपछि बाँकी कार्यसूची अगाडि नबढाउने सहमति भएको थियो। सहमतिअनुसार नै कांग्रेस आज वेल घेर्न नआएको हो।’
-1746009348.jpg)
