भ्रष्टाचार र सामाजिक सञ्जाल बन्दको विरोधमा जेनजी उमेर समूहका युवाहरूले सोमबार राजधानी सहित देशभर विरोध प्रदर्शन आयोजना गरेको थियो।
यो युवा समूहमा सन् १९९७ देखि २००७ सालका बीचमा जन्मिएका युवाहरू पर्छन्।
उक्त समूहले सार्वजनिक रूपमा केही दिन अघिदेखि नै टिकटक/रेडिट लगायतका सामाजिक सञ्जाल मार्फत् आन्दोलनको घोषणा गरेको थियो। सोमबार बिहान ९ बजेदेखि सुरू भएको प्रदर्शनमा बिहान ११ बज्दा उल्लेख्य संख्यामा युवा प्रदर्शनकारी जम्मा भएका थिए।
जेनजीको प्रदर्शनकारीले सोमबार १२ बजे नयाँ बानेश्वरस्थित ब्यारिकेड तोडे। ठूलो संख्यामा प्रदर्शनकारी संसद भवनको गेटतर्फ अघि बढे। त्यतिबेला गृहमन्त्री रमेश लेखक, गृहसचिव गोकर्णमणि दुवाडी लगायत सिंहदरबारमा रहेको राज्य व्यवस्था एवं सुशासन समितिमा थिए।
समितिमा प्रहरी विधेयकमाथि छलफल चलिरहेको थियो। गृहमन्त्री लेखक भने सामाजिक सञ्जाल बन्दको समर्थनमा धारणा राखिरहेका थिए।
‘जम्माजम्मी सरकारले सूचीकरण गर भनेको हो,’ लेखकले समितिमा भनेका थिए, ‘दर्ता गर्दैनौँ। मेरो देशमा काम गर्न दिदैनौँ भनेको होइन। जम्माजम्मी सूचीकरण गर भनेको हो।’
लेखकले सरकारले मेरो देशमा कुन संस्था काम गर्दैछ भनेर पहिचानमात्र गर्न खोजेको बताए।
‘मेरो देशमा काम गर्ने संस्थालाई सरकारले सूचीकृत गर भन्न पाउँदैन,’ लेखकको प्रश्न थियो, ‘अनि तेरो कानुन मान्दिनँ, संविधान मान्दैनौँ…भोलि कुनै संस्था आएर तेरो देश मान्दैनौँ भन्यो भने हामी के भन्छौँ?’
गृहमन्त्री लेखक समितिमा रहँदासम्म बानेश्वरमा भइरहेको प्रदर्शनबारे बेखबर जस्तै थिए।
प्रदर्शनकारीहरूले बानेश्वरको संसद भवन अगाडि ढुंगा हान्न थालेपछि मात्र उनले गृहसचिव गोकर्णमणि दुवाडीसँग कानेखुसी गरेका थिए। लगत्तै उनले समिति बाहिर पुगेर कोही व्यक्तिसँग कुरा गरे।
त्यसको केहीबेरमा काठमाडौंका प्रमुख जिल्ला अधिकारी छवि रिजालसँग प्रहरी मार्फत् सम्पर्क गरे। केहीबेरसम्म बेखबर जस्तै गृहमन्त्रीले तत्कालै कर्फ्यू लगाउन आदेश दिए। लगत्तै काठमाडौं प्रशासनले नयाँ बानेश्वर क्षेत्रमा कर्फ्यू आदेश जारी गर्यो।
जेनजी पुस्ताको आन्दोलनमा क्रममा अहिलेसम्म मृत्यु हुनेको संख्या १३ पुगेको छ भने कैयौं घाइते भएको प्रहरीले जनाएको छ। घाइतेहरूको विभिन्न अस्पतालमा उपचार जारी छ।
-1746009348.jpg)
