दाङमा शान्तिपूर्ण रह्यो जेनजीको प्रदर्शन (तस्बिरहरू)

नारायण खड्का

दाङ, भदौ २३

दाङका विभिन्न ठाउँमा जेनेजीले प्रदर्शन गरे।

दाङको तुलसीपुर, घोराही र लमहीमा ठूलो संख्यामा जेनेजी सडकमा देखिएका थिए। भ्रष्टाचारको विरोध र सामाजिक सञ्जालमाथि लगाइएको प्रतिबन्ध फुकुवा उनीहरूको विशेष माग थियो।

तुलसीपुरको प्रदर्शन विशाल रह्यो। विभिन्न स्कुल र कलेजका विद्यार्थी युनिफर्मसहित जेनजीहरू प्रदर्शनमा सहभागी थिए। त्यो भिडबाट प्रधानमन्त्री केपी शर्मा ओलीविरुद्ध पनि चर्का नाराबाजी भए।

चर्को गर्मीमा बीच वीरेन्द्रचोकमा सडक खण्डमै बसेर नाराबाजी गर्दै उनीहरूले प्रदर्शन गरेका थिए। गर्मी हुँदा एक अर्कालाई पानी दिने, छ्याप्ने गरिरहेका थिए।

प्रदर्शनमा सहभागीमध्ये कतिपय विद्यार्थीले जनप्रतिनिधि तथा नेताहरूले आफ्ना सन्तानको मात्रै भविष्य बनाएको र जनताको छोराछोरीलाई खाडी जान बाध्य पारेको भन्दै आक्रोश पोख्दै थिए।

उनीहरूले हातमा प्रमाणपत्र भए पनि त्यो बेकामे बनेको, विदेश पलायन हुन बाध्य भएको, वर्षौंदेखि तुलसीपुर–सल्यान सडकखण्ड जस्ताको त्यस्तै अलपत्र अवस्थामा छाडिँदा ज्यानको बाजी लगाएर यात्रा गर्नुपर्ने अवस्था आएको, मुलुकमा चरम भ्रष्टाचार मौलाएको लगायत गुनासो नारामार्फत राखेका थिए।

स्वस्फूर्त रूपमा भएको भनिएको आन्दोलनमा यस क्षेत्रका चलेका विभिन्न निजी विद्यालय र कलेजका विद्यार्थीहरू बढी सामेल थिए।

पढाइमा अब्बल कतिपय विद्यार्थीसमेत पढाइ छोडेर प्रदर्शनमा आएका देखिन्थे। यी विद्यार्थीको आन्दोलनको नेतृत्व भने पश्चिम दाङको सामुदायिक क्याम्पस राप्ती बबई क्याम्पसका विद्यार्थी संगठनका नेताहरूले गरिरहेको देखिन्थ्यो।

वीरेन्द्रचोकको प्रदर्शनमा उग्र नाराबाजी हुँदा र त्यो भिडलाई शान्त पार्न सोही सामुदायिक क्याम्पसका विद्यार्थी नेताहरूले भूमिका निर्वाह गरिरहेको देखिन्थ्यो। जसमा कतिपय नेपाल विद्यार्थी सङ्घका साथै अन्य विभिन्न संगठनका विद्यार्थी नेताहरू पनि सामेल थिए। रास्वपा निकट विद्यार्थी संगठन नेताहरूको पनि सहभागिता देखिन्थ्यो।

सोमबार दाङका प्रमुख तीनै शहरमा आन्दोलन भए पनि त्यो शान्तिपूर्ण रूपमा सकिएको छ।

दाङको तुलसीपुरमा भएको जेनेजी पुस्ताको आन्दोलन नियाल्दा अधिकांश विद्यार्थी युनिफर्ममै आएका थिए।

हामीसँग कुराकानी गरेका धेरैले टिकटकमार्फत सार्वजनिक भएको भिडिओ हेरेर आन्दोलनमा सहभागी भएको बताएका थिए।

तुलसीपुर उपमहानगरपालिकाबाट सञ्चालित ‘तुलसीपुर बहुप्राविधिक मेट्रो कलेज’ का कानुन संकायमा अध्ययनरत विद्यार्थी पनि युनिफर्मसहित आन्दोलनमा सहभागी थिए।

त्यसबारे बुझ्दा कलेजका प्रमुख वसन्त आचार्यले अहिले परीक्षा चलिरहेको हुँदा पठनपाठन बन्द भएकाले विद्यार्थीहरू आन्दोलनमा सहभागी भएको विषयमा थाहा नभएको बताए।

उनीहरूको आन्दोलनका कारण लुम्बिनी, कर्णाली र सुदूरपश्चिमका प्रमुख शहरहरूमा दिउँसो केही बेर यातायातका साधन सञ्चालन ठप्पप्रायः बनेको थियो।

प्रहरीका अनुसार बाँकेको नेपालगञ्जको आन्दोलन पनि शान्तिपूर्ण बित्यो।

कोहलपुर क्षेत्रमा केही उच्छृङ्खल गतिविधि प्रदर्शनकारीहरूले देखाउन खोजे पनि प्रहरी प्रशासनले त्यसलाई समयमै निस्तेज पारेको थियो।

सोमबार कर्णाली प्रदेशको राजधानी सुर्खेतको आन्दोलन पनि शान्तिपूर्ण बन्यो।

त्यस्तै, सुदूरपश्चिम प्रदेशको केन्द्र धनगढी र कैलालीको आन्दोलन पनि शान्तिपूर्ण रह्यो।

प्रहरीका अनुसार लुम्बिनीका साथै कर्णाली प्रदेश र सुदूरपश्चिम प्रदेशका प्रमुख शहरहरूमा जेनेजी पुस्ताले आन्दोलन स्वरूप सडकमा असन्तुष्टि पोखे पनि प्रहरी प्रशासनको सावधानीका कारण कुनै पनि हिंसात्मक गतिविधि हुन पाएन।

प्रदर्शनमा उत्रिएकाहरूले नेताहरूका घर खोज्न थालेपछि लुम्बिनी प्रदेशअन्तर्गत बुटवल र भैरहवा क्षेत्रमा भने सोमबार बेलुकादेखि अनिश्चितकालीन कर्फ्यू आदेश जारी गरिएको छ।

dang-protest-(14)-ink-1757330538.jpeg