राष्ट्रिय स्वतन्त्र पार्टीका सांसद असिम शाहले सांसद पदबाट राजीनामाको घोषणा गरेका छन्।
सामाजिक सञ्जाल फेसबुकमार्फत शाहले आजकै मितिदेखि तत्काल प्रभावकारी रूपमा राजीनामा गरेको घोषणा गरेका हुन्।सेतोपाटीसँगको कुराकानीमा शाहले पार्टी र संसद् सचिवालयलाई औपचारिक रूपमा राजीनामा बुझाउन बाँकी रहेको बताए।
‘जेन–जी आन्दोलनलाई सरकारले दमन गर्ने कार्य, शान्तिपूर्ण प्रदर्शनमा गोली चलाउने जस्ता अमानवीय कदम र नागरिक अधिकारमाथिको ठाडो हस्तक्षेप मेरो विवेक र जनताप्रतिको उत्तरदायित्वविपरीत भएको छ,’ शाहले भने, ‘मैले पटक–पटक सदनमा युवाको आवाज उठाएँ, चेतावनी दिएँ— यदि युवाको भावना बुझिएन भने सडक विद्रोह हुन सक्छ। तर, सरकार सञ्चालकहरूले कहिल्यै सुन्न चाहेनन्, न त गम्भीरतापूर्वक लिए।’उनले संसद् भवनको सुरक्षाभन्दा बालबालिकाको ज्यान ठूलो भएको टिप्पणी गरेका छन्।
‘संसद्मा बसेर चुप लाग्नु वा यस्ता गलत नीतिहरूलाई मौन समर्थन गर्नु मेरो पुस्ता, मतदाता र देशको भविष्यसँग ठूलो विश्वासघात हुनेछ भन्ने दृढ विश्वासका साथ मैले यो निर्णय लिएको छु,’ शाहले लेखेका छन्, ‘सांसद पद मेरो लागि केवल पद होइन, नागरिकको आवाज प्रतिनिधित्व गर्ने माध्यम हो। तर, जब त्यो आवाज दबाइन्छ र सरकारले नागरिकप्रतिको प्रतिबद्धता तोड्छ, त्यस्तो संसद्मा बसिरहनु मेरो लागि अब सम्भव छैन।’
उनले सडकमा उत्रिएर जेन–जी पुस्ता, नागरिक र सत्यको पक्षमा लड्ने बताएका छन्।
-1746009348.jpg)
