वीरगञ्ज महानगरपालिकाको बजार क्षेत्रमा अनिश्चितकालका लागि कर्फ्यू लगाइएको छ।
प्रमुख जिल्ला अधिकारी तोयनारायण सुवेदीले आदेश जारी गर्दै अर्को आदेश जारी नभएसम्मका लागि कर्फ्यूको समयावधि थप गरिएको बताए।
स्थानीय प्रशासन ऐन २०२८ को दफा ६ (क) बमोजिम जारी गरिएको कर्फ्यू आदेशमा वीरगञ्ज महानगरको बजार क्षेत्रको पूर्वमा बाइपास रोड, पश्चिममा सिर्सिया पुल, उत्तरमा गण्डक चोक र दक्षिणमा शंकराचार्य गेटसम्म कर्फ्यू लगाइएको जनाइएको छ।
कर्फ्यू लगाइएको स्थानहरूमामा आवतजावत गर्न, कुनैपनि प्रकारको भेला जुलुस, प्रदर्शन सभा, बैठक र घेराउ गर्न निषेध गरिएको छ।
तर कर्फ्यूको आदेश अवधिभर अत्यावश्यक सेवाका सवारी साधनहरू एम्बुलेन्स, दमकल, शव बाहन, स्वास्थ्यकर्मीका सवारी साधनहरू, सञ्चारकर्मीहरू, पर्यटक सवारी साधनहरू, मानव अधिकार तथा कूटनीतिक नियोगका सवारी साधनहरू र हवाई टिकटको आधारमा हवाई यात्रुहरूको आवगमनमा सुरक्षाकर्मीहरूबाट सहजीकरण हुने जिल्ला प्रशासन कार्यालय पर्साले जनाएको छ।
वीरगञ्ज क्षेत्र बिहानैदेखि तनावग्रस्त छ। प्रदर्शनकारीले सरकारी कर्यालय र नेताका घरहरूमा आगजनी गरेका छन्।
वीरगञ्ज महानगरपालिका, आन्तरिक राजश्व कार्यालय, नेपाल टेलिकमको घण्टाघरस्थित कार्यालय प्रदर्शनकारीहरूले आगजनी गरेका छन्।
प्रदर्शनकारीले वीरगञ्ज महानगरका नगर प्रमुख राजेशमान सिंह, निवर्तमान संघीय प्रशासन मन्त्री एवं एमाले नेता राजकुमार गुप्ता, निवर्तमान खानेपानी मन्त्री प्रदीप यादव मधेश प्रदेशका पूर्व मुख्यमन्त्री लालबाबु राउत गद्दी, कानुनमन्त्री अजय चौरसियाको घरमा आगजनी गरेका छन्।
त्यसैगरी, वीरगञ्जमा रहेको नेकपा एमाले र नेपाली कांग्रेसको पर्सा जिल्ला कार्यालयहरूमा पनि आगजनी गरेका छन्।
वीरगञ्जका विभिन्न स्थानमा प्रदर्शन गर्नुका साथै उनीहरूले सुरक्षाकर्मीमाथि ढुंगा प्रहार गरेका थिए। सुरक्षाकर्मीले स्थिति नियन्त्रणमा लिन दर्जनौं राउण्ड अश्रु ग्यास प्रहार गरेको थियो।
-1746009348.jpg)
