पोखरामा प्रदर्शनकारीहरूले रहेका प्राय सबैजसो सरकारी कार्यालयमा आगजनी गरेका छन्।
मंगलबार प्रदर्शनकारीले दिउँसोदेखि लगाएको आगो रात पर्दासम्म निभेका छैन। धुँवाको मुस्लो उडिरहेको छ।
पोखराको सभागृह चोकबाट बिहान ११ बजेतिर सुरू भएको प्रदर्शनकारीको र्याली न्युरोडमा रहेको महानगरको कार्यालय अगाडि पुगेपछि हिंसात्मक भएको थियो।
प्रदर्शनकारीले महानगरको कार्यालयको गेट फोडेर आगो लगाउन खोजेपछि प्रहरीले अश्रुग्यास प्रहार गरेको थियो।
प्रदर्शनकारीले प्रहरीमाथि ढुंगामुढा बर्साउन थालेपछि प्रहरी पछाडि हटेको थियो। त्यहीबेला प्रदर्शनकारीले महानगरभित्र छिरेर आगजनी गरेका थिए। त्यसपछि प्रदर्शनकारीले पोखरा महानगरका मेयर धनराज आचार्यको घर जलाउनुका साथै तोडफोड गरेका थिए।
मेयर आचार्यको घर जलाएर प्रदर्शनकारी गण्डकी प्रदेशका मन्त्री विन्दुकुमार थापाको घर जलाउन नयाँबजार गए।
उनीहरूले मन्त्री थापाको घर र अटो स्वरूम पनि जलाएका छन्। नयाँ बजारबाट प्रदर्शनकारी मुख्यमन्त्री तथा मन्त्रिपरिषदको कार्यालय, मन्त्रालयहरु, सिडिओ कार्यालय, जिल्ला अदालत, अख्तियार दुरूपयोग अनुसन्धान आयोगको पोखरा कार्यालय, जिल्ला मालपोत कार्यालय, यातायात व्यवस्था कार्यालय जलाएका छन्।
प्रदर्शनकारीले पोखराकै भाटभटेनी सुरपरमार्केट लगायत निजी व्यवसायिक प्रतिष्ठानमा पनि जलाएका छन्।
उनीहरूले गण्डकी प्रदेश सभा भवन, इलाका प्रशासन कार्यालय लेखनाथ, महेन्द्रपुलको नेपाल टेलिकमको कार्यालय, पोखरा–८ को वडा कार्यालय लगायत सरकारी कार्यालय तथा निजी प्रतिष्ठानहरूमा पनि आगो लगाएका छन्।
जिल्ला प्रशासन कार्यालयले प्रदर्शन नियन्त्रण गर्न पोखराका मुख्य क्षेत्रहरू र सरकारी कार्यालय रहेका क्षेत्रहरूमा मंगलबार बिहानैदेखि कर्फ्यू आदेश जारी गरेको थियो।
कर्फ्यू आदेश जारी भएपछि प्रहरीले माइकिङ समेत गरेको थियो। प्रदर्शनकारीले कर्फ्यू उल्लघंन मात्र गरेनन्, सरकारी सम्पत्ति ध्वस्त पार्न कुनै कसर बाँकी राखेनन्।
जेनजी प्रदर्शनको पहिलो दिन सोमबार निस्किएको जुलुसमा शान्तिपूर्ण रूपमा युवा तथा विद्यार्थीको सहभागिता रहेको थियो।
जुलुस पोखराको मानव अधिकार चोक पुगेर समापन भएको घोषणा गरिए पनि उत्तेजित भिड मुख्यमन्त्री कार्यालयमा पुगेर आगजनी गर्न खोजेपछि प्रहरीसँग मुठभेड भएको थियो।
मंगलबार भने महानगरपालिकामा आगो लगाउन खोज्दा केही बेर प्रहरीसँग मुठभेट भए पनि त्यसपछि सुरक्षाकर्मी पछाडि हटेको थियो। महानगरपालिका आगो लगाएपछि प्रदर्शनकारीलाई रोक्न न कुनै सुरक्षाकर्मी सडकमा निस्किए, न भिडलाई नियन्त्रण गर्न कसैले नेतृत्व नै लिए।
जहाँ जहाँ सरकारी कार्यालय त्यहीँ पुगेर उनीहरूले आन्दोलन उत्तेजित पार्ने र आगो लगाउने काम गरिरहे।
प्रदर्शनमा सोमबारदेखि नै राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा) का नेता तथा कार्यकर्ताको घुसपैठ देखिएको थियो। उनीहरूले जेनजीको प्रदर्शन भड्काउन भरमग्दुर प्रयत्न गर्नुका साथै आगजनी गर्न उक्साएका थिए।
यसरी नै उक्साएर उनीहरूले पोखराको पृथ्वीचोकमा रहेको शहिद लखन थापाको शालिक तोडफोड गरेर राजाको प्रतिमा राख्न भ्याएका छन्।
पोखरामा भएको प्रदर्शनमा स्वार्थ समुहको घुसपैठले निम्त्याउन सक्ने खतराबारे न आन्दोलनकारी सचेत भए न राज्यले कुनै पूर्वतयारी नै गर्यो।
यस्तो घुसपैठले निम्त्याउन सक्ने वितण्डाबारे राज्यका निकायहरू र आन्दोलनको आह्वान गरेका कसैले पनि अहिलेसम्म जिम्मेवारी वहन गरेका छैनन्।
प्रदर्शनकारीले दिनभर लगाएको आगोका कारण पोखराको आकाश धुँवाले ढाकिएको छ।
पोखरा अन्तर्राष्ट्रिय विमानस्थल पूर्ण रूपमा बन्द भएको छ भने भिजिविलिटी पनि कमजोर बनेको छ। सहरका व्यापार, व्यवसाय लगायत पूर्ण रूपमा बन्द छन् भने सडकमा सवारी साधन पनि कम चलेका छन्।
प्रदर्शनकारीको मोटरसाइकल जुलुसले सडक दिनभरी ढाकिएको थियो। उनीहरूलाई रोक्न सुरक्षाकर्मी र आन्दोलनका नेतृत्वकर्ता कोही देखिएका छैनन्।
जिल्ला प्रहरी कार्यालय, हाेटल बाराही, बगैंचा रिसाेर्ट, बरपिपल रिसाेर्ट, गण्डकीका भाैतिक पूर्वाधारमन्त्री प्रकाशबहादुर केसीकाे घर, एनसेलकाे कार्यालय, इलाका प्रहरी कार्यालय बैदाम, नेपाल रेडक्रस साेसाइटी, एमाले र कांग्रेसकाे पारपार्टी कार्यालय, शिक्षाा कार्यालय, परिक्षा नियन्त्रक कार्यालय, गण्डकी विश्वविद्यालय लगायतका कार्यालय पनि जलाएका छन् ।
अहिले पनि कार्यालयहरू प्रदर्शनकारीहरूले जलाउँदै हिँडेका छन् ।
-1757431122.jpg)
-1757431122.jpg)
-1757431053.jpg)
-1757431052.jpg)
-1757431054.jpg)
-1746009348.jpg)
