एकीकृत समाजवादीका महासचिव घनश्याम भूसालले जेन–जी प्रदर्शनकारीसँग माफी माग्दै मुलुकको लोकतन्त्र र राष्ट्रिय हितको रक्षा गर्न आग्रह गरेका छन्।
सामाजिक सञ्जाल फेसबुकमा स्ट्याटस लेख्दै महासचिव भूसालले जेन–जीका नामा अरू नै शक्तिले लुट्ने खतरा रहेकाले सचेत रहन भनेका छन्।
‘नौजवान युवाहरू (जेनजी) ! तपाईंहरूलाई वारेस बनाएर मुलुकको लोकतन्त्र र राष्ट्रिय हितमाथि खतरा थोपरिँदै छ। मेरो पुस्ताका नालायकीप्रति म लज्जित छु, माफी माग्छु। तर त्यसका नाममा तपाईंहरूलाई अरूले लुट्न नपाओस्,’ उनले अपिलमार्फत् भनेका छन्।
भदौ २३ गते नौजवान युवा पुस्ता (जेनजी) ले जुन माग राखेर र जुन आचार संहिताको घोषणा गरेर आन्दोलन आरम्भ गरेका थिए त्यसले सबै नेपालीलाई स्वःस्फुर्त आकर्षित गरेको थियो। त्यसले उनीहरुको जम्मेवारी बोधको उचाईसमेत प्रदर्शन गरेको थियो। तर निहत्था र अबोध नौजवानहरूमाथि सरकारले गरेको बर्बरतापूर्ण राक्षसी आक्रमणले सम्पूर्ण राजनीतिक र मनोवैज्ञानिक परिस्थितिलाई हल्लाई दियो,’ उनले भनेका छन्।
सरकारले गरेको नरसंहार र प्रधानमन्त्री केपी शर्मा ओलीको नालायकीको पराकाष्टालाई बहाना बनाएर हिजो बिहानदेखि देशभरिका सार्वजनिक सम्पत्तिमाथि आक्रमण, तोडफोड र आगजनीका जेजस्ता घटना भए ती जनताको स्वःस्फुर्त आक्रोशले मात्रै भएका थिएनन् भन्ने तथ्य बुझ्न समय लाग्ने उनको भनाइ छ।
‘यसबाट मुलुकले महाभूकम्प र भारतको नाकाबन्दीकै जस्तो खर्बौंको राष्ट्रिय सम्पत्तिको ध्वंश भएको छ। एकै दिनमा देशभरि लुट, तोडफोड र आगजनीको ताण्डवले हाम्रो राष्ट्रिय मानसपटलमा जुन चोट पुञ्याएको छ त्यसले हामीलाई दशकौंसम्म झस्काइ रहनेछ,’ उनले भनेका छन्।
प्रधानमन्त्री ओलीको अप्राकृतिक सत्तालिप्साका कारण मुलुकले १० वर्षमा हासील गर्न सक्ने तीव्र आर्थिक विकास र सामाजिक तथा साँस्कृतिक आधारहरू निर्माणका अवसर गुमाएको उनको बुझाइ छ।
‘भदौ २३ गतेको नरसंहारले मुलुकलाई फेरि अर्को चरणको नियन्त्रित अस्थितरता तर्फ धकेलेको छ। दुर्भाग्यवश्, एउटा कुरा निश्चित भएको छ कि नेपाल अब फेरि उथलपुथलको नयाँ श्रृङ्खलामा प्रवेश गरेको छ। वस्तुतः भ्रष्टाचार विरुद्ध उठेका नौजवान युवा आन्दोलनकारीबाट आन्दोलनकै अपहरण भएपछि यो ताण्डवको आरम्भ भएको थियो। अब पर्दा पछाडिका शक्तिहरू नेपाललाई युक्रेन, लिबिया वा बंगलादेश बनाउने प्रयास गर्नेछन् भन्ने कुरामा हेक्का नराख्नु आज जीवित रहेको हाम्रो पुस्ताको घोर नालायकी हुनेछ,’ उनको भनाइ छ।
लोकतान्त्रिक स्थिरताका साथ समृद्ध बन्ने नेपाल राष्ट्रको आकांक्षालाई बोक्न सक्ने योग्यता भएको जिम्मेवार नेतृत्वको अभावमा हाम्रा राजनीतिक पार्टीहरु जनताबाट अलग्गिँदै गएको उनले स्मरण गरेका छन्।
‘मैले २०७५ सालको संसद विघटन लोकतान्त्रिक गणतन्त्रको ओरालो यात्रा हो, यही नेतृत्व रहिरह्यो भने यो नेपाली जातका अझै ठूला दुर्दिन नजिक आउँदै छन् भनेर राजनीतिक समुदायलाई बुझाउने प्रयास गरिरहेँ। भ्रष्टाचार नगर्ने सदस्यहरूको पार्टीबिना लोकतान्त्रिक गणतन्त्रलाई बचाउन सकिन्न भनेर चिच्याइरहेँ। दलाल पुँजीवादसँग गठजोड गरेको नेतृत्वबाट लोकतान्त्रिक गणतन्त्रको रक्षा हुनै सक्दैनथ्यो। त्यस सत्यलाई राजनीतिक पार्टीहरूमा स्थापित गर्न सकिएन। राजनीतिको मिटरब्याजमा सत्ताभोग गरिरहेका नेताहरूबाट हामी धेरै पटक पराजित भयौं जसको मूल्य अहिले मुलुकले ति उनले भनेका छन्।
देशभक्ति, लोकतन्त्र र मुलुकको समृद्धिको लागि दशकौंसम्म बलिदान र त्यागले निर्माण भएका राजनीतिक पार्टीका लाखौं कार्यकर्ताहरु सामाजिक लफंगाहरुबाट लखेटिनु पर्ने भएको उनले बताए। दिनदहाडै मुलुकको चीरहरण हुँदा त्रस्त, हतास, निरुपाय भएर लुक्नु पर्ने पनि अवस्था आएको उनले बताएका छन्।
‘मुलुकको यस असाधारण हलचलको अवस्थामा हाम्रो पङ्तिमा हतासा, पलायन, आत्मसमर्पण देखिनु स्वाभाविक हो। तर हरेक क्रान्तिकारी आन्दोलन आफैभित्रका नालायकीमाथि विजय हासील गर्दै अगाडि बढ्छ। यो धक्का हाम्रो विचारको असफलता होइन, लोकतन्त्र र समाजवादका मूल्यहरुको असफलता होइन, त्याग र बलिदानले बनाएको हाम्रो इतिहासको असफलता पनि होइन। यो त गणतन्त्रलाई बिर्ता ठान्ने केवल केही नेताहरूको असफलता हो, ती नेताका स्वार्थको लक्ष्मण रेखा नाघेर अगाडि बढ्न नसक्ने हाम्रो नादानीको असफलता हो। यस वास्तविकतालाई आत्मसात गर्न सक्यौं भने हामीले हतासा, पलायन र आत्मसमर्पणलाई सजिलै जित्न सक्छौं। त्यसैले अझ बढी धीरता, दूरदृष्टि र हिम्मतका साथ परिस्थितिको मूल्यांकन गर्दै हाम्रा अभिभारा निर्धारण गरौं। अब हामीलाई बाटो देखाउन कुनै महापुरुष बाँकी छैन। परिस्थिति नयाँ छ, त्यसैले नयाँ परिस्थितिको विचार, राजनीति र संगठनका साथै नयाँ नेतृत्व निर्माण गर्दै अघि बढौं,’ उनले आग्रह गरेका छन्।
नयाँ राजनीतिक–भूराजनीतिक घटनाहरू कसरी घट्छन् अहिले नै भन्न नसकिने उनले बताएका छन्।
‘अहिलेका घटनाक्रम जतिसुकै अप्राकृतिक र असह्य भए पनि यो भन्दा बढी जनधनको क्षति नहोस् भन्ने कुरामा ध्यान दिऊँ। तर राजनीतिलाई असाधारणरूपले प्रतिक्रान्तिकारी दिशामा लैजाने, हामीले आर्जेका राजनीतिक तथा संवैधानिक व्यवस्थाहरूलाई भत्काउने र हामीलाई असफल मुलुक घोषणा गर्ने प्रयासलाई नजिकबाट अध्ययन गर्दै हाम्रो तर्फबाट खेल्नु पर्ने भूमिकाका लागि तयार रहौं। हामी समयको परिक्षामा छौं, सामना गर्न मनसा–वाचा–कर्मणा तयार होऔं,’ उनको आग्रह छ।
-1746009348.jpg)
