राष्ट्रिय स्वतन्त्र पार्टी (रास्वपा) का सभापति रवि लामिछानेले कारागारबाट निस्किने आफ्नो चाहना नभएको बताएका छन्।
बुधबार साँझ फेसबुकमार्फत भिडिओ सन्देश जारी गर्दै उनले भिड बढेपछि कारागारले नै आफूलाई जबरजस्ती बाहिर निकालेको बताएका हुन्।
ललितपुरस्थित नख्खु कारागारमा रहेका रवि मंगलबार आन्दोलन क्रममा जेलबाट बाहिरिएका हुन्। उनले आफू प्रक्रिया पुर्याएर बाहिरिएको बताएका छन्।
'भिड बढेपछि कारागारले मलाई जबरजस्ती बाहिर निकालेको हो। मैले बिनापत्र जान्न भनेको हुँ। उनीहरूले जस्तो पत्र दिए, जस्ताको तस्तै सार्वजनिक गरिसकेको छु,' उनले भनेका छन्।
उनले त्यसबारे आफूले नेपाल प्रहरी र सशस्त्र प्रहरीका आइजीहरूलाई समेत भनिसकेको बताए।
'मलाई तपाईंहरूले आफ्नो कस्टडीमा राख्नुस्, नियन्त्रणमा लिनुस् वा कारागार पठाउनुस् भनेँ। उहाँहरूले नै भन्नुभयो, तपाईं आफै सुरक्षित बस्नुस्। आवश्यक परे सम्पर्क गर्छौं। सुरक्षा दिन नसकेरै हिजो कारागारले तपाईंलाई पत्र दिएको होला भन्नुभयो,' उनले भने।
सुरक्षा निकायबाट यस्तो जबाफ आएपछि बुधबार नै आफूले न्यायिक निकायहरूलाई समेत औपचारिक जानकारी गराइसकेको उनले बताएका छन्।
त्यस्तै केपी ओली र शेरबहादुर देउवालाई जनताले लखेटे पनि उनीहरूले आफूमाथि लगाएको झुटो मुद्दा नहटेको रविले बताए।
'जनताले ओली–देउवालाई खेदेर लखेटे। तर तिनले लगाएको झुटो मुद्दा मेरो टाउकोबाट अझै हटेको छैन। सरकार छैन, सुरक्षा निकायले सुरक्षा दिन सक्दैन। आफै सुरक्षित बस् भन्छ। कारागार प्रशासन मलाई निस्केर बाटोमा जा भन्छ। जहाँ एउटा ठूलो भिड आगो लिएर हातमा आक्रोश लिएर निस्केको छ। अब भन्नुहोस् म बाँच्न पाउने कि नपाउने?,' उनले भनेका छन्।
उनले आफूमाथि लागेको मुद्दा कानुनी माध्यमबाटै लडिरहने पनि बताएका छन्।
'ओली–देउवाको कुशासनको सबैभन्दा ठूलो शिकार भएको हुँ म। तिनले लगाएको झुटो मुद्दा जिल्लैपिच्छे अझै पनि खेपिरहेको छु,' उनले भनेका छन्।
रविले आफू र आफ्नो दल सरकार बनाउने वा सरकारमा जाने दौडमा नरहेको पनि बताएका छन्।
यो आन्दोलन जेनजीले गरेको र सरकारको अबको नेतृत्व पनि जेनजीले नै तय गर्ने उनले बताएका हुन्।
'म सरकार बनाउने सरकारमा जाने कुनै दौडमा छैन। कसैसँग कुनै बैठक गरेको छैन। मेरो नाममा कुनै विवाद गर्न जरूरी छैन। म यो दौडमा छैन। दौडमा नआओस् भनेर डिफेम (बदनाम) गर्न पनि पर्दैन। तर देश लोकतन्त्र रहनुपर्छ। नागरिक सर्वोच्चता रहनुपर्छ। यो विषयमा कसैसँग नडराइ दह्रोसँग उभिने तागत बाँचुन्जेल राख्नेछु,' लामिछानेले भनेका छन्।
उनले आफू र रास्वपालाई कुनै राजनीतिक लाभ नचाहिएको बताए।
'कांग्रेस एमालेबाट जेनजीसम्म आइपुग्दा पनि ममाथिको अन्याय नरोकिने नै हो त?,' रविले भने, 'जेलले निस्की भनेर धेकेलेर निकालिदिएको पत्र बोकेर म सुरक्षा निकायले नै सुरक्षा दिन नसक्ने त्यही जेलमा कुन विधिबाट जाऊँ?'
उनले सर्वाधिक मत ल्याएर संसद छिरेको मान्छेलाई ओली, देउवा, गगन थपा, आरजु देउवाहरूले छलपूर्वक, बलपूर्वक संसदबाट निकाले पनि जनताको मनबाट निकाल्न नसकेको दाबी गरे।
'एउटा नेताको पछाडि कहिले लाखौंको भीड हुन्छ। कहिले ऊ एक्लै खडा हुनुपर्छ। रवि लामिछाने दुवैका लागि तयार भएर मात्रै राजनीतिको मैदानमा आएको हो जो कहिल्यै लुकेर बसेन। सबै जनताको आमनेसामने रह्यो। यिनले कालकोठरीमा थुन्दा पनि यिनको मुटु हल्लिने गरी वक्तव्य निकालेर भ्रष्टहरूलाई ललकारेको मान्छे हुँ म। नबिर्सिनुहोला। आजभन्दा दुई–तीन दिनअघि पनि राजनीतिक प्रतिशोध भयो भनेर यस देशका झन्डै ४० लाख मानिसहरूले हस्ताक्षर गरेरै ऐक्यबद्धता जनाएका छन्,' उनले भनेका छन्।
-1746009348.jpg)
