पूर्वप्रधानमन्त्री केपी शर्मा ओलीविरूद्ध नेपाली कांग्रेसका नेता तथा पूर्वसांसद अभिषेक प्रताप शाहले कर्तव्य ज्यान मुद्दामा जाहेरी दिएका छन्।
कपिलवस्तुका शाहले जिल्ला प्रशासन कार्यालय कपिलवस्तुमार्फत प्रहरी वृत्त नयाँ बानेश्वर काठमाडौंमा जाहेरी दिएका हुन्।
जेनजी समूहले गरेको प्रदर्शनमा गोली चलाउन पूर्वप्रधानमन्त्री ओलीले आदेश दिएको र सो क्रममा युवाहरूको ज्यान गएको भन्दै शाहले ओलीविरूद्ध जाहेरी दिएका हुन्।
शाहले शनिबार प्रमुख जिल्ला अधिकारी दिलकुमार तामाङलाई जाहेरी पत्र बुझाएका थिए। प्रमुख जिल्ला अधिकारी तामाङले उक्त जाहेरी पत्र आफूले सम्बन्धित निकायमा पुर्याउने बताए।
उक्त जाहेरी पत्रमा ओलीको आदेश दिएपछि गोली चलाउँदा १७ देखि ४५ वर्ष उमेर समूहका १०/१५ जनाभन्दा बढी युवाको मृत्यु भएको र धेरै घाइते भएको उल्लेख छ।
मृत्यु भएका युवाहरूमा सुलभ राज श्रेष्ठ, यम चौलागाईं, बुद्धि तामाङ, मिसल सारू मगर, पारुहाङ उतमल राई, योगेन्द्र न्यौपाने, विनोद महर्जन, दिल नारायण तामाङ, प्रविन कुलुङ, उमेश महत, निता गौतम, सौरभ किशोर श्रेष्ठ, सुवास बोहरा र नीरज पन्त लगायतको नाम समावेश छ।
यता प्रहरी वृत्त बानेश्वरले अहिले उजुरी दर्ता गर्ने अवस्था नरहेको बताएको छ।
‘वृत्तमा जाहेरी दर्ता गर्ने ठाउँ छैन, अहिले हाम्रो कुनै पनि वृत्तमा दर्ता हुने अवस्था छैन। अहिले व्यवस्थापनमा नै छौं,’ जिल्ला प्रहरी परिसर काठमाडौंका एसपी अपिलराज बोहराले भने।
-1746009348.jpg)
