नेपाली कांग्रेस गण्डकीका सभापति शुक्रराज शर्माले देशलाई छिटोभन्दा छिटो निकास दिन कांग्रेसले आधिकारिक निर्णय लिनुपर्ने बताएका छन्।
सभापति शेरबहादुर देउवा बिरामी भए पनि अरू पदाधिकारी, केन्द्रीय कार्यसम्पादन समिति र केन्द्रीय समिति बैठक बसेर देशलाई निकास दिने गरी आधिकारिक निर्णय लिनुपर्ने उनले बताएका हुन्।
‘पार्टी सभापति बिरामी हुनुहुन्छ भनेर चुप लागेर बस्न सकिँदैन,’ उनले भने, ‘देशलाई निकास दिन र विरोधीका लागि पनि बाटो देखाउन चाँडो भन्दा चाँडो कांग्रेसले उपयुक्त निर्णय गर्नुपर्छ।’
कांग्रेस गण्डकी प्रदेश कार्यसम्पादन समितिको मंगलबार बसेको बैठकले जेनजी आन्दोलनबाट उत्पन्न राष्ट्रिय संकटबारे गम्भीर छलफल गरेर देश, संविधान र पार्टी जोगाउन पनि यथाशीघ्र निर्णय लिनुपर्ने उनले बताए।
‘कार्यसम्पादन समितिको बैठकले कांग्रेसले अब अवलम्बन गर्ने बाटोबारे निर्णय लिन पार्टीको पदाधिकारी बैठक, केन्द्रीय कार्यसम्पादन समिति, केन्द्रीय कार्यसमिति, महासमिति, विशेष महाधिवेसन वा १५ औं महाधिवेशनमध्ये कुन सहज हुन्छ त्यसै निकायबाट अथाशीघ्र निर्णय लिई निकास दिनुपर्छ,’ निर्णयमा भनिएको छ, ‘देश जलेको विषम परिस्थितिमा कुनै पनि बहानामा समय खेर फाल्न हुँदैन।’
प्रदेश सभापति शर्माले जेनजी पुस्ताका युवाहरूले उठाएका मुद्दा आफूहरूले ३, ४ बर्ष अघिदेखि उठाउँदै आएको पनि बताए।
देशमा भ्रष्टाचार झाँगिएको र पार्टीमा इमान्दार व्यक्तिले अवसर नपाएको विषय सभापति शेरबहादुर देउवाकै अगाडि पनि राखेको उनले बताए।
‘भ्रष्टाचारबाट पार्टीलाई मुक्त पार्नुपर्छ। इमान्दार, नैतिकवान मुल्य भएकालाई राख्नुपर्छ भनेर हामीले ३, ४ वर्ष अघिदेखि उठाउँदै आएका थियौं। सभापतिकै सामुन्ने पनि यी कुरा राखेका थियौं,’ उनले भने, ‘अहिले जेनजी युवाहरूले उठाएका मुद्दा हामीले ३, ४ वर्षदेखि उठाउँदै आएका मुद्धा हुन्।’
राजनीतिक दल नसुधारिकन देश र समाज सुधार्न नसकिने पनि उनले बताए। पार्टीले प्रजातन्त्र छाड्दा जनताले कांग्रेस छाडेको भन्दै उनले प्रजातान्त्रिक मूल्य र मान्यताअनुसार पार्टी अघि बढाउनुपर्ने बताए।
जेनजी आन्दोलनका क्रममा सभापति देउवासहित नेताहरूमाथि गरिएको भौतिक आक्रमणको भत्र्सना गर्दे प्रदेश कार्यसम्पादन समितिले स्वास्थ्य लाभको कामना गरेको छ।
जेनजीले उठाएका जायज मागलाई आत्मसाथ गरी आपसी सद्भाव र पार्टीहरुवीच छलफल र समन्वय गर्ने पनि कांग्रेस गण्डकीले निर्णय गरेको छ।
आन्दोलनका क्रममा सहादत प्राप्त गरेका परिवारलाई समवेदना र घाइतेको शीघ्र स्वास्थ्य लाभको कामना पनि गरेको छ। जेनजी आनदोलनका नाममा घएका धनजनको क्षतिबारे न्यायिक छानबिन गर्न माग गरेको कांग्रेस गण्डकीका प्रवक्ता माधव बास्तोला ‘मधु’ले बताए।
बैठकमा गण्डकी प्रदेशका मुख्यमन्त्री एवं पार्टी केन्द्रीय सदस्य सुरेन्द्रराज पाण्डेलगायत कांग्रेस गण्डकीका पदाधिकारी उपस्थित थिए।
-1746009348.jpg)
