नेकपा (माओवादी केन्द्र)का उपमहासचिव वर्षमान पुनले आगामी महाधिवेशनमा पुष्पकमल दाहाल 'प्रचण्ड' नेतृत्वको प्रतिस्पर्धामा नआउने बताएका छन्।
शुक्रबार केन्द्रीय समिति बैठकपछि पत्रकारहरूसँगको कुराकानीमा पुनले प्रचण्ड आफैले पनि भनिसकेका कारण आगामी महाधिवेशनमा उनी अध्यक्ष नबन्ने र नेतृत्वको प्रतिस्पर्धामा पनि नआउने बताएका हुन्।
'उहाँ अध्यक्षका रूपमा रहनुहुन्न उहाँले भनिसक्नुभएको छ। प्रतिस्पर्धै गर्नुहुन्न। उहाँको आफ्नो भूमिका राजनीतिक होला अभिभावकीय होला। संगठनात्मक नेतृत्व वा अध्यक्षमा उहाँले प्रतिस्पर्धा गर्नुहुँदैन,' उनले भने।
उनले पार्टीका अन्य पदाधिकारी पनि फेरि पदमा नआउने विषयमा छलफल हुने बताए।
'हामी चाहिँ त्यहाँसम्मको लागि छलफल बहस युवाहरूले जनताले के भन्छ? दोस्रो तेस्रो पुस्ता आउनुपर्छ भनियो भने छुट्टै नत्र आफ्नो तर्फबाट पनि त्याग गर्न तयार छौं,' उनले भने।
उनले देश, लोकतन्त्र र व्यवस्थाका लागि जस्तोसुकै त्याग गर्न पनि तयार रहेको बताए।
'देश रहनुपर्छ, लोकतन्त्र रहनुपर्छ अहिलेको भन्दा राम्रो व्यवस्था र परिवेश बनोस्। हामी सबैले आ-आफ्नो ठाउँबाट त्याग गर्न तयार छौं।हिँजो युद्धमा ज्यान त्याग्न हिँडेका थियौं। त्यो बलिदानले अहिलेको गणतन्त्र संघीयता अहिले आएको हो। अब हामी आफ्नो पद प्रतिष्ठा आफ्नो ठाउँहरू छाड्न तयार छौं तर देश अगाडि बढ्नुपर्छ, व्यवस्था बँच्नुपर्छ अझै सुधार आउनुपर्छ। युवाहरूको संकल्प हो हामी सबैको संकल्प हो,' उनले भने।
माओवादीको विहीबार र शुक्रबार काठमाडौंमा भएको केन्द्रीय कमिटी बैठकले केन्द्रीय कमिटी भंग गरी मंसिर अन्तिममा महाधिवेशन गर्ने निर्णय गरेको थियो।
बैठकले मौजुदा केन्द्रीय कमिटीलाई महाधिवेशन आयोजक समितिमा रूपान्तरण गरेको छ। प्रचण्ड समितिको संयोजक बनेका छन्।
उनी आफैले पनि बैठकपछि पत्रकारहरूसँगको कुराकानीमा आफू अब अध्यक्ष नरहेको बताएका थिए।
यो पनिः अब म अध्यक्ष रहिनँः प्रचण्ड
-1746009348.jpg)
