धरान उपमहानगरपालिकाका मेयर हर्क साम्पाङले दल दर्ताका लागि निर्वाचन आयोगमा निवेदन दिएका छन्।
मेयर साम्पाङले आइतबार दल दर्ताका लागि निवदेन दिएको निर्वाचन आयोगका प्रवक्ता नारायणप्रसाद भट्टराईले जानकारी दिए।
‘हर्कराज राईलाई संयोजक राखेर दल दर्ताका लागि निवदेन दिनु भएको छ। पार्टीको नाम श्रम संस्कृति पार्टी र चुनाव चिह्न माटाको ढिस्को प्रस्तावित छ,’ उनले भने।
मेयर साम्पाङले केही समय अघिदेखि नै दल दर्ताको तयारी गरेका थिए।
२०७९ सालको स्थानीय तह निर्वाचनमा उनले लौरो चिह्न लिएर उम्मेदवारी दिएका थिए। उनी २० हजार ८२१ मतका साथ मेयर निर्वाचित भएका थिए। निकटतम प्रतिस्पर्धी कांग्रेसका उम्मेदवार किशोर राईले १६ हजार ५९ मत प्राप्त गरेका थिए।
भदौ २३ र २४ को आन्दोलनपछि बनेको अन्तरिम सरकारमा आफूले जेन–जी युवाहरूको भावनाअनुसार काम गर्छु भन्दा पनि नपत्याइएको गुनासो गर्दै आएका साम्पाङले फेसबुक लाइभमार्फत् प्रत्यक्ष कार्यकारी राष्ट्रपतीय पद्धतिमा जानुपर्ने धारणा राखेका थिए।
उनी अन्तरिम सरकारमा गृहमन्त्रीका आकांक्षी थिए। गृहमन्त्री बन्न उनले लबिङ तीव्र बनाएका थिए।
‘२०७२ को कानुनमा टेकेर नयाँ (नियम, पद्धति) हामी बनाउन सक्छौं त? सक्दैनौं। यो विद्रोह अर्कै चिज बनाउनका लागि हो। त्यही म्यान्डेटअनुसार गर्छु भन्दा मलाई पत्याउनुभएन। अथवा कुनै प्रभुशक्ति... अथवा के पनि हुनसक्छ..,’ उनले भनेका थिए।
देशमा फेरि एउटा चुनाव ल्याउन मात्र भयानक विद्रोह नभएको र आन्दोलनपछि त्यसको मर्मअनुरूप चल्न नसकेको उनको गुनासो थियो।
‘पुरानै संसद ठीक थियो नि त्यो भए, पुरानो संसदलाई किन विघटन गरेको! पुरानो संसदन विघटन गर्यो, नयाँ सांसदहरू चुन्ने, यति मात्रै थिएन के आन्दोलन! चिज चाहिँ अर्कै बनाउनुपर्ने थियो। कार्यकारी प्रमुखसहितको बनाउनुपर्ने थियो,’ उनले भने।
-1746009348.jpg)
