नेपाल पत्रकार महासंघका निवर्तमान केन्द्रीय अध्यक्ष बिपुल पोख्रेलले प्रेस स्वतन्त्रताको रक्षा र लोकतन्त्र बलियो बनाउन फागुन २१ को निर्वाचन अपरिहार्य भएको बताएका छन्।
पत्रकारहरूले चुनावी माहोलका पक्षमा कमल चलाउनुपर्नेमा उनले जोड पनि दिएका छन्।
नेपाल प्रेस युनियन दाङ शाखाले आइतबार घोराहीमा आयोजना गरेको एक कार्यक्रममा पोख्रेलले सरकार लोकतन्त्र नियन्त्रण गर्ने मनसायका साथ प्रस्तुत हुन खोजेको भन्दै त्यसले वाक तथा प्रेस स्वतन्त्रतामाथि संशय पैदा भएको बताए।
'सरकारका पछिल्ला विज्ञप्तिहरू स्वतन्त्र प्रेस र वाक स्वतन्त्रतालाई झस्काउने खालका छन्,' उनले भने, 'नियन्त्रित लोकतन्त्रमा न प्रेस स्वतन्त्रता बाँच्न सक्छ, न चुनावको सही जनमत प्राप्त हुन सक्छ।'
जेन–जी आन्दोलनको उद्देश्य सही भए पनि त्यसलाई राजनीतिक रङ दिने दुश्प्रयासहरू हुन नहुने उनले बताएका थिए।
'जेन–जी आन्दोलन राजनीतिक परिवर्तनभन्दा पनि सामाजिक न्याय र भ्रष्टाचार अन्त्यका लागि थियो,' पोख्रेलले भने, 'कसैले त्यसैमा टेकेर राजनीतिक रोटी सेक्न खोजे थप दुर्घटना निम्तिने छ।'
-1746009348.jpg)
