'जो बदलिन्छन् तिनले नेतृत्व लिन्छन्, जो बदलिँदैनन् तिनले बिदा लिन्छन्'

कांग्रेस विशेष महाधिवेशनका लागि हस्ताक्षर गर्न चाहनेले असोज २४ गतेभित्रै गर्न आग्रह

सेतोपाटी संवाददाता

काठमाडौं, असोज २१

नेपाली कांग्रेसका महामन्त्री विश्वप्रकाश शर्माले पार्टीको विशेष महाधिवेशन माग गर्न हस्ताक्षर गर्न चाहनेहरूले असोज २४ गतेभित्रै हस्ताक्षर गर्न भनेका छन्।

आफूले कसैलाई पनि फोन गरेर विशेष महाधिवेशनका लागि हस्ताक्षर गर्न नभनेको तर आफूलाई फोन गरेर सोध्नेहरूलाई भने हस्ताक्षर गर्न भनेको शर्माको भनाइ छ।

भिडिओ:

विशेष महाधिवेशनले पार्टीलाई कमजोर नबनाउने र यो विधानको व्यवस्थाअनुसार नै भएको उनको भनाइ छ।

‘विशेष महाधिवेशन माग गर्न हस्ताक्षर गर्न चाहनुहुन्छ भने असोज २४ गतेभित्रै गर्नुस् न,’ महामन्त्री शर्माले मंगलबार एक भिडिओ सन्देश जारी गर्दै भनेका छन्, ‘किनकी साथीहरूले भन्नुभएको छ- हामी केन्द्रीय कार्यसमितिको बैठक (असोज २६ गते) भन्दा एक दिन अगाडि असोज २५ गते नै हस्ताक्षर केन्द्रीय कार्यालयमा दर्ता गर्न चाहन्छौं। सँगसँगै उभिन चाहनुहुन्छ भने साइत केका लागि पर्खनुहुन्छ?’

उनले ४० प्रतिशतले हस्ताक्षर गरेर केन्द्रीय कार्यसमिति आफैले विशेष महाधिवेशन बोलाए हुन्न भनेर पनि सुझाव दिएको शर्मा बताउँछन्।

‘यो सही सुझाव हो, विधानअनुसार पनि केन्द्रीय समितिले चाहेमा विशेष महाधिवेशन बोलाउन सक्छ, असोज २६ को केन्द्रीय समितिमा यो सुझावबारे पनि छलफल गर्छौं,’ उनले भने, ‘अहिलेको विषम परिस्थितिमा जमेको पोखरीजस्तो बसिरहन चाहन्नौं, उपयुक्त निष्कर्षमा जरूर पुग्नेछौं। तर केन्द्रीय समितिले विशेष महाधिवेशन बोलाउन नचाहेमा के गर्ने? ४० प्रतिशत महाधिवेशन प्रतिनिधिको हस्ताक्षरले जे मागेको छ, त्यो मागलाई सम्बोधन गर्ने।’

उनले नियमित महाधिवेशन गर्न सक्नु नै सर्वोत्तम विकल्प हुने बताए। नियमित महाधिवेशनले सबै तहले ताजा नेतृत्व पनि पाउनेछ। ‘तलदेखि माथिसम्म युवाहरूको व्यापक सहभागीता बढाउन सक्नेछौं,’ उनले भने।

छोटो समयमा पनि कांग्रेसले नियमित महाधिवेशन गर्न सक्ने उनले बताए। नियमित महाधिवेशन नभए विशेष महाधिवेशन हुने पनि महामन्त्री शर्माको भनाइ छ। उनले आफूहरू बदलिने र बदलिएको समयअनुसार कांग्रेस बदल्ने संकल्प गर्नुपर्ने महामन्त्री शर्माले बताए।

‘जो बदलिन्छन् तिनले नेतृत्व लिन्छन्, जो बदलिँदैनन् तिनले बिदा लिन्छन्,' शर्माले भने।

महामन्त्री शर्माको भिडिओ वक्तव्यमा उल्लेखित ७ बुँदा;

१) विशेष महाधिवेशनका लागि हस्ताक्षर गर्नु कि नगर्नु?

* कयौं जिल्लाबाट टेलिफोन र म्यासेजमार्फत नेपाली कांग्रेसका आदरणीय महाधिवेशन प्रतिनिधि साथीहरूले शोधिरहनु भएको छl
* हस्ताक्षर गर्नुस् है भनेर आफै टेलिफोन गरेर मैले कसैलाई पनि भनेको छै l तर शोध्ने मित्रहरूलाई भन्ने गरेको छु- हस्ताक्षर गर्नोस्।

२) कतिपय साथीहरूले दोस्रो जिज्ञासा राख्नु भएको छ- विशेष अधिवेशनले त पार्टीलाई झनै कमजोर बनाउँछ भन्छन् नि त

मैले भन्ने गरेको छु- विशेष अधिवेशन विधान विपरीत होइनl जब पार्टीको विधानमै यो व्यवस्था छ भने त्यसको परिपक्व ढंगले प्रयोग गर्दा त्यसले अन्ततः पार्टीलाई कमजोर बनाउन्नl हामी सबै जान्दछौं, मान्छेको पनि अप्रेसन गरिँदा त्यसले थोरै असर निश्चय नै गर्छ, तर सफल अप्रेसनपछि मान्छे बिस्तारै तन्दुरूस्त हुन्छl

३) तेस्रो नम्बरमा कतिपयले सोध्नु भएको छ- २६ गते बस्ने पार्टी केन्द्रीय समितिको बैठक हेरेर, त्यसपछि हस्ताक्षर उचित हो कि?

मैले स्पष्ट भन्ने गरेको छु, हस्ताक्षर गर्नु नै छ त किन आइतबार बार्नुहुन्छl भनिन्छ नि लगनपछिको पोते के काम? जो मित्रहरूले हस्ताक्षर संकलनको नेतृत्व गर्दै हुनुहुन्छ तिनलाई प्रष्ट भनिदिनोस् - सरी म हस्ताक्षर गर्दिनँl तर गर्न चाहनुहुन्छ भने २४ असोज भित्रै गर्नु राम्रोl किनकि २६ गतेको बैठकभन्दा १ दिनअघि नै केन्द्रीय कार्यालयमा हस्ताक्षर सहितको निवेदन दर्ता गर्ने योजना साथीहरूले बनाउनु भएको/ हामीलाई बताउनु भएको छl साथ उभिन चाहेको हो भने, साइत किन हेर्नुहुन्छ?

४) ४० प्रतिशतको हस्ताक्षर नगरेर केन्द्रीय समितिले नै बिशेष अधिवेशन बोलाए हुन्न? कतिपय मित्रले चौथो नम्बरमा यो सुझाव पनि दिनु भएको छl विल्कुल सहि सुझाव l पार्टी विधानको दफा १७ को उपदफा २ भन्छ - केन्द्रीय समितिले चाहेमा विशेष अधिवेशन बोलाउन सक्नेछl असोज २६ गतेको बैठकमा यो सुझाव उपर पनि छलफल हुनेछ l
अहिलेको विषम परिस्थितिमा- हामी जमेको पोखरी जस्तो बस्न सक्दैनौं, उपयुक्त निष्कर्षमा हामी सबै पुग्न चाहन्छौंl

५) तर केन्द्रीय समितिले बोलाउन चाहेन भने कसो गर्ने? पाँचौ जिज्ञासामा प्रष्ट धारणा यत्तिमात्र- तब ४० प्रतिशत महाधिवेशन प्रतिनिधिको हस्ताक्षरले माग गरे बमोजिम विशेष अधिवेशनमा जाने l विधानको त्यही दफा र त्यही उपदफाले यो व्यवस्था गरेकै छl

६) यहाँनिर छैटौं र सर्वाधिक महत्त्वपूर्ण प्रश्न उठ्छ - विशेष अधिवेशन उचित कि नियमित महाधिवेशन गर्नु उपयुक्त?
मेरो प्रष्ट धारणा छ- मंसिर मसान्तभित्र गर्ने गरी पार्टीको १५ औं महाधिवेशन आयोजना गर्नु यतिबेलाको सर्वोत्तम बाटो होl
तब सबै तहले ताजा नेतृत्व पाउनेछl तब हामी विधानमा परिमार्जन गरेर `बटम टु टप´ युवा सहभागीता व्यापक बढाउन सक्नेछौंl

७) यति छोटो समयमा नियमित महाधिवेशन गर्न सकिएला? सक्नुपर्छ र जरुर सकिन्छl जेनजी पुस्ता युवाहरूको दुई अढाइ दिनको प्रदर्शनले पुरै सत्ता उलटफेर गर्न सक्यो भने, दुई/अढाइ महिनामा कांग्रेसको महाधिवेशन गर्न किन सकिन्न? सकिन्न कसैले भन्नुभएमा- तपाईंको हस्ताक्षरले हामी सबैलाई स्वागत गर्नेछ- विशेष महाधिवेशनमा।

अन्त्यमा, केन्द्रीय कार्यसमिति बैठकमा बहस होला, भिन्नभिन्न विचार आउलान् , तर अन्ततः अत्यन्तै संयम र परिपक्वतापूर्वक छलफल गरेर उपयुक्त निष्कर्षमा पुग्नु हामी सबैको साझा जिम्मेवारी होl हामी त्यो गर्नेछौंl

हौसला राखौं, यत्ति संकल्प गरौं- हामी बदलिन्छौ र बदलिएको समय अनुरुप कांग्रेस बदल्नेछौंl
बदलिएको कांग्रेस तपाईं र मेरा लागि कम देशका लागि बढी जरूरी छl मैले भन्ने गरेको छु- जो बदलिन्छन् , तिनले नेतृत्व लिन्छन्, जो बदलिन्नन् तिनले बिदा लिन्छन्l

यो पनि: पार्टी पदाधिकारी, केन्द्रीय सदस्यहरूलाई भेटेका छैनन् देउवाले, फोन संवाद मात्र

प्रकाशित मिति: मंगलबार, असोज २१, २०८२ २२:३३

सिफारिस