नेपाली कांग्रेसको केन्द्रीय समिति बैठक अबको चार दिनपछि असोज २६ गते बस्दैछ।
भदौ २४ गते जेनजी पुस्ताको आन्दोलनका क्रममा आगजनी भएको सानेपास्थित केन्द्रीय कार्यालयमै केन्द्रीय समिति बस्नेछ।
केन्द्रीय समिति बैठक नजिकिँदासमेत बैठकका एजेन्डाबारे छलफल भएको छैन।
विगतमा केन्द्रीय समितिअघि पदाधिकारी र पूर्वपदाधिकारीहरूसँग सम्भावित एजेन्डा र त्यसमाथि नेताहरूको सहमति खोज्न पनि सभापति देउवाले अनौपचारिक कुराकानी गर्ने गरेका थिए।
तर यसपालि देउवाले पदाधिकारी तथा पूर्वपदाधिकारी बैठक अहिलेसम्म बोलाएका छैनन्।
प्राय: महामन्त्रीद्वय गगन थापा र विश्वप्रकाश शर्मासँग परामर्श गरी सभापति देउवाले केन्द्रीय समितिका एजेन्डा तयार पार्ने गरेका थिए। यसपालि केन्द्रीय समितिका एजेन्डाबारे अहिलेसम्म उनीहरूसँग पनि कुराकानी भएको छैन।
सभापति शेरबहादुर देउवा र तत्कालीन परराष्ट्र मन्त्री आरजु राणा देउवामाथि जेनजी आन्दोलनका क्रममा भदौ २४ गते बूढानीलकण्ठस्थित घरमै आक्रमण भएको थियो। सभापति देउवाको गर्धन र टाउकोमा चोट लागेको थियो।
सभापति देउवा स्वास्थ्यलाभ गरिरहेका छन्।
साथै देउवाले राजनीतिक सक्रियता देखाउन थालेका छन्। सभापति देउवाले केही पदाधिकारी तहका नेताहरूसँग भौतिक रूपमा भेटेर कुरा गरेका छन् भने केन्द्रीय सदस्यहरूसँग फोनमा कुराकानी गर्ने गरेका छन्।
‘सभापति देउवा काठमाडौंमा एउटा घर भाडामा लिएर बस्न थाल्नुभएको छ, स्वास्थ्य राम्रो छ, सीमित पदाधिकारीहरूसँग भेटेरै कुराकानी भइरहेको छ,’ देउवानिकट स्रोतले भन्यो, ‘फोनमा त पहिलेदेखि नै कुराकानी भइरहेकै छ।’
जेनजी आन्दोलनका क्रममा भदौ २४ गते प्रदर्शनकारीहरूले देउवाको घर आगजनी गरेका थिए भने देउवा दम्पतीमाथि आक्रमण भएको थियो। सोही दिनदेखि देउवा उपचारमा थिए। त्यसैले उनी सार्वजनिक रूपमा देखिएका छैनन्। सुरक्षाका कारण सभापति देउवा बसोबास गरेको ठाउँ पनि सार्वजनिक गरिएको छैन। सभापति देउवा सार्वजनिक रूपमा नदेखिएको २९ दिन भइसकेको छ।
त्यसैले पनि सभापति देउवा २६ असोजदेखि बस्ने केन्द्रीय समिति बैठकमा उपस्थित हुन्छन् कि हुँदैनन् भन्ने चासो छ।
सभापति देउवानिकट स्रोतले ‘सभापति देउवाले नै केन्द्रीय समिति बैठक बोलाएकोले बैठकमा भाग लिने कुरा’ बताएको छ।
‘सभापतिज्यूको स्वास्थ्य राम्रो भइसकेको छ, उहाँले नै केन्द्रीय समिति बैठक बोलाउनुभएकोले उपस्थित हुनुहुन्छ,’ सभापति देउवानिकट स्रोतले भन्यो।
सभापति देउवा उपचारमा रहँदा उपसभापति पूर्णबहादुर खड्काको संयोजकत्वमा केन्द्रीय कार्यसम्पादन समितिका बैठक बसेका थिए।
प्रचार विभाग प्रमुखसमेत रहेका केन्द्रीय सदस्य मीनबहादुर विश्वकर्माले पनि सभापति देउवा असोज २६ देखि सुरू हुने केन्द्रीय समिति बैठकमा सहभागी हुने जानकारी दिए।
‘केन्द्रीय समिति बैठक सुरू गर्न सभापतिज्यू केन्द्रीय कार्यालय आउनुहुन्छ, तीन-चार दिनसम्म बैठक बस्न सक्छ, बैठकको पूरा अवधिभर सभापतिज्यू बस्नुहुन्छ कि हुँदैन चाहिँ अहिले यकिन छैन, उहाँको स्वास्थ्य अवस्थामा भर पर्छ,’ उनले भने।
प्रचार विभाग प्रमुख विश्वकर्माका अनुसार सभापति देउवाले उपसभापति, महामन्त्रीलगायत पदाधिकारीसँग भेटेका छन् भने अरूसँग टेलिफोनमा संवाद भइरहेको छ।
‘आवश्यकताअनुसार सीमित पदाधिकारीहरूसँग सभापतिज्यूले भेटघाट गरिरहनुभएको छ, एक-दुई दिनमा पदाधिकारी बैठक पनि राख्नुहोला,’ उनले भने।
समसामयिक राजनीति, प्रतिनिधि सभा विघटन गरेर फागुन २१ मा निर्वाचन घोषणा, मनाङ प्रदेश सभा क्षेत्र उपनिर्वाचन, बाढी पहिरोलगायतका एजेन्डामाथि केन्द्रीय समितिमा छलफल हुने उनले बताए।
साथै कांग्रेसभित्र नियमित वा विशेष महाधिवेशन मागसमेत भइरहेको अवस्था छ।
२०७८ मंसिरमा भएको १४ औं महाधिवेशनबाट निर्वाचित सभापति देउवाको नियमित कार्यकाल यही मंसिरमा सकिँदैछ।
विगतको अभ्यासअनुसार एक वर्ष केन्द्रीय कार्यसमितिको म्याद थप गर्ने वा नगर्ने, सभापतिमा देउवालाई नै निरन्तरता दिने कि कसैलाई कार्यवाहक तोक्ने, नियमित वा विशेष महाधिवेशनका प्रक्रियामा अघि बढ्नेजस्ता विषयसमेत बैठकमा कुरा उठ्ने सम्भावना छ।
संस्थापनइतर समूहले सकेसम्म नियमित नभए विशेष महाधिवेशन गरी नेतृत्व परिवर्तन गर्नुपर्ने बताउँदै आएको छ भने त्यसका लागि महाधिवेशन प्रतिनिधिहरूको हस्ताक्षर संकलन चलिरहेको छ।
विशेष महाधिवेशन माग गर्दै असोज २५ गते महाधिवेशन प्रतिनिधिहरूले हस्ताक्षर बुझाउने तयारी गरेका छन्। विधानअनुसार कारण खुलाएर ४० प्रतिशत महाधिवेशन प्रतिनिधिको हस्ताक्षर बुझाएमा तीन महिनाभित्र विशेष महाधिवेशन बोलाउनुपर्ने हुन्छ।
२०७८ मा भएको १४ औं महाधिवेशनमा कांग्रेसमा ४७४३ जना महाधिवेशन प्रतिनिधि थिए। त्यसबेला सभापतिमा देउवाले ६० र शेखर कोइरालाले ४० प्रतिशत मत ल्याएका थिए भने महामन्त्रीमा गगन थापाले ६४ प्रतिशत मत ल्याएका थिए।
विशेष महाधिवेशन माग गर्दै जिल्ला-जिल्लामा गोप्य रूपमा हस्ताक्षर संकलन अभियान चलिरहेको छ। नेता गुरूराज घिमिरेले ४० प्रतिशत महाधिवेशन प्रतिनिधिहरूको हस्ताक्षर संकलन भइसकेको दाबी गर्दै यसलाई बढाएर ५१ प्रतिशत पुर्याई विशेष महाधिवेशन माग गरिने बताइरहेका छन्।
महामन्त्रीद्वय गगन थापा र विश्वप्रकाश शर्मा नियमित महाधिवेशन नहुने अवस्थामा विशेष महाधिवेशनमा जाने पक्षमा छन्। महामन्त्री शर्माले भिडिओ सन्देश जारी गर्दै असोज २४ गतेसम्म विशेष महाधिवेशनका लागि हस्ताक्षर गर्न भनेका छन्।
नेता शेखर कोइराला पक्षका केही महाधिवेशन प्रतिनिधिहरूले पनि विशेष महाधिवेशनका लागि हस्ताक्षर गरेका छन्। नेता शेखरले विशेष महाधिवेशनबारे प्रष्ट रूपमा अभिव्यक्ति नदिएकोले जिल्ला तहमा उनीनिकट केही महाधिवेशन प्रतिनिधि भने अन्योलमा छन्।
-1746009348.jpg)
