नेपाली कांग्रेसको क्रियाशील सदस्यता व्यवस्थापन समिति बैठक बसेको छ।
पार्टी केन्द्रीय कार्यालय सानेपामा बुधबार महामन्त्री गगन थापाको अध्यक्षतामा बैठक बसेको हो।
बैठकमा क्रियाशील सदस्यता नवीकरणका सन्दर्भमा जिल्ला-जिल्लामा भइरहेका कामकारबाहीमाथि केन्द्रित रहेर छलफल भएको थियो।
भदौ २३ र २४ गते जेनजी पुस्ताको आन्दोलनका क्रममा प्रदर्शनकारीले केन्द्रीय कार्यालयसहित ४८ कार्यालयमा आगजनी भएको थियो।
आगजनीले कतिपय स्थानमा क्रियाशील सदस्यता नवीकरण नामावली र उक्त विवरण रहेको कम्प्युटरमा पनि क्षति पुगेको थियो।
क्रियाशील सदस्यता व्यवस्थापन समितिका सदस्य प्रकाश रसाइली 'स्नेही'ले आजको बैठकमा जेनजी आन्दोलनका क्रममा आगजनीमा परेका पार्टी कार्यालयमा क्रियाशील सदस्यता विवरणको अवस्था के-कस्तो छ भन्नेलगायत विषयमा कुराकानी भएको बताए।
‘केन्द्रदेखि पार्टीका तल्ला समितिका कार्यालय आगजनी भएको अवस्था छ, कहाँ क्रियाशील सदस्यताको अवस्था के छ भन्नेजस्ता विषयमा आज छलफल गरियो,’ उनले भने, ‘यी सबै अभिलेखीकरण गरेर असोज २६ देखि बस्ने केन्द्रीय कार्यसमिति बैठकमा पेस गर्ने कुरा भएको छ।’
पार्टी कार्यालयहरू आगजनी हुँदा क्रियाशील सदस्यता नवीकरणका काम पनि रोकिन पुगेको थियो। कांग्रेसले असोज मसान्तभित्र क्रियाशील सदस्यता नवीकरणका लागि समय दिएको छ। अहिलेसम्म ६० प्रतिशत बढी क्रियाशीलले नवीकरण गराएको अवस्था छ।
कांग्रेसमा नियमित वा विशेष महाधिवेशन गर्नुपर्ने आवाज छ। नियमित महाधिवेशन गर्ने भए क्रियाशील सदस्यता पहिले टुंगो लगाउनुपर्ने हुन्छ भने विशेष महाधिवेशन गर्ने भए २०७८ मंसिरको १४ औं महाधिवेशनमा भाग लिएका महाधिवेशन प्रतिनिधि नै मतदाता हुन्छन्।
-1746009348.jpg)
