अमेरिकी राष्ट्रपति डोनाल्ड ट्रम्प र चिनियाँ समकक्षी सी चिनफिङको भेट भन्दा अघि चीनले दुर्लभ खनिज पदार्थको निर्यातमा फेरि कडाइ गरेको छ।
दोस्रो कार्यकालको सुरूमै चीनसँग व्यापार युद्ध थालेका ट्रम्प पछिल्लो समय सीसँग भेटेर सम्झौता गर्न आतुर छन्। त्यसै क्रममा दुई नेताले दक्षिण कोरियामा अक्टोबरको अन्त्यमा हुने एसिया प्यासिफिक इकोनोमिक कोअपरेसन फोरमको शिखर सम्मेलनमा भेट्ने तय भएको छ।
सो भेटअघि चीनले दुर्लभ खनिज पदार्थको निर्यातमा फेरि कडाइ गरेको भनेर ब्लुमबर्गले लेखेको छ।
यस पटकको व्यापार युद्धमा दुर्लभ खनिज पदार्थको हतियार प्रयोग गरेर ट्रम्पलाई झुकाएको चीनले दुई राष्ट्रपतिको भेटअघि फेरि कडाइ गरेको हो।
सुरूमा दुर्लभ खनिज पदार्थको निर्यातमा मात्रै चीनले रोक लगाएको थियो। अहिले भने केही चिनियाँ दुर्लभ खनिज पदार्थ प्रयोग गरेर अरू देशमा बनाएको सामान निर्यात गर्नका लागि पनि चीनको वाणिज्य मन्त्रालयसँग स्वीकृति लिनु पर्ने नियम ल्याएको छ।
चीनको वाणिज्य मन्त्रालयले बिहीबार एक विज्ञप्ति जारी गर्दै त्यस्तो घोषणा गरेको हो। सो विज्ञप्तिले चीनको राष्ट्रिय सुरक्षा र हितको रक्षाका लागि चिनियाँ दुर्लभ खनिज पदार्थ प्रयोग गरेर बनाएको सामान निर्यात गर्न मन्त्रालयबाट निर्यात इजाजतपत्र प्राप्त गर्नुपर्ने भनेको छ।
चीनले नयाँ प्रतिबन्ध कसरी लागू गर्ने योजना बनाएको छ भन्ने अझै स्पष्ट छैन । तर नयाँ चिनियाँ प्रतिबन्ध यसअघि अमेरिकाले चिनियाँ कम्पनीहरूलाई केही उच्च गुणस्तरका चिप्स र ती चिप्स बनाउने उपकरणको खरिद गर्नबाट रोक्नका लगाएको प्रतिबन्धसँग मिल्दोजुल्दो भएको भनेर ब्लुमबर्गले जनाएको छ।
केही महिनाअघि सिकागोस्थित फोर्ड मोटर कम्पनीको कारखानामा दुर्लभ खनिज प्रयोग गरेर बनाइने चुम्बक अभावमा काम रोकिएको थियो। अमेरिकामा रहेका अरू मोटर कम्पनीको कारखानामा पनि काम रोकिने खतरा भएपछि ट्रम्पले पहल गरेर जुन ५ मा चिनियाँ राष्ट्रपति सीसँग ९० मिनेट टेलिफोन कुराकानी भएको थियो।
त्यसपछि कैयौं चरणको वार्त पछि दुई देश सहमति नजिक पुगेका छन् भने ट्रम्पले लगातार सीसँग भेट्न प्रयास गरिरहेका छन्।
यस्तोमा दक्षिण कोरियामा ट्रम्प र सीबीच भेट हुनु अघि चीनले दुर्लभ खनिज पदार्थको निर्यातमा फेरि कडाइ गरेको हो। व्यापार सम्झौताका लागि मोलमोलाइ गर्नका लागि चीनले यस्तो कदम चालेको हुन सक्छ।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1746009348.jpg)
