कांग्रेसमा जेनजी पुस्ताका युवाहरू प्रवेशको ढोका फराकिलो बनाउन माग

सेतोपाटी संवाददाता

काठमाडौं, असोज २६

नेपाली कांग्रेसका जेनजी पुस्ताका युवाहरूले विधान संशोधन गरेर युवालाई पार्टी आउने ढोका फराकिलो बनाउन माग गरेका छन्।

जेनजी पुस्ताका १९ जना कांग्रेसका युवाहरूले शनिबार अपिल जारी गर्दै पार्टीमा युवाहरू आउने ढोका फराकिलो बनाउन माग गरेका हुन्।

यस्तो छ अपिल;

नेपाली कांग्रेसलाई जेनजी उमेर समूहका युवाहरूको अपिल:

विधानमा संशोधन गरेर हामी आउने ढोका फराकिलो बनाइयोस्!

देशमा सुशासन स्थापनाका लागि अग्रसर निश्चित उमेर समूहको साझा आवाज र साझा अभियान होl जेनजी हरेक घरमा छन् र हरेक दलभित्र छन् l भदौ अन्तिम साताको प्रदर्शनमा सहादत दिएका प्रत्येक युवाप्रति साँचो श्रद्धाञ्जली तब हुनेछ, जब हामी देशमा भ्रष्टाचार नियन्त्रण गर्न र सुशासन स्थापित गर्न सफल हुनेछौंl

यो उद्देश्य प्राप्तिका लागि सर्वत्र छरिएका यो उमेर समुहका युवाहरूबिच `भिन्नभिन्न ठाउँमा रहेर पनि एक र अभिन्न रहन मिल्ने साझा मुद्दामा एक्यवद्धता जरूरी छ´l हामी यसप्रति प्रतिबद्ध छाैंl संगै, आफू आवद्ध रहेको दल, संस्था या समूहमा बदलिएको समय अनुरुपको बदलाव अत्यावश्यक छl त्यसकारण, हामी विनम्रतापूर्वक अपील गर्दछौं- `सबै बदलिऔं, सबै मिलेर देश बदलौं।’

लोकतान्त्रिक प्रणालीले नागरिकको जीवनमा तब बदलाव ल्याउन सक्छ जब यसलाई शासनको मात्रै होइन आत्मानुशासनको पद्धतिका रूपमा आत्मसाथ गरिन्छ। `हामी´ भनिरहँदा, यो मान्यतामा विश्वास राख्नेहरु हौं `हामी´l त्यो विश्वासलाई पुरानै शैली र पुरानै प्रवृत्तिबाट कसैले पनि नेतृत्व गर्न सक्दैन l अतः प्रत्येक नयाँ या पुराना दलमा परिवर्तन जरूरी छl

हामी प्रत्येक व्यक्तिको प्रवृत्तिमा अनि विचार समूहहरूको शैलीमा परिवर्तन जरुरी छ l हरेकको चरीत्रमा र समयको चित्रमा जबर्जस्त परिवर्तन जरुरी छl यो भावना प्रष्ट र दृढ ढंगले राख्ने जेनजी उमेर समूहका हजारौं युवाको प्रतिनिधित्व गर्दै- ७ वटै प्रदेशका, भिन्नभिन्न समुदायका हामी १९ युवा आजको मितिमा सबैभन्दा पुरानो दल नेपाली कांग्रेसलाई `मुलुकमा भएको परिवर्तनलाई गम्भीर रूपले आत्मसाथ गर्दै, आफूभित्र परिवर्तनको सहज र तीब्र मार्ग रोज्न´ अपील गर्दछौंl

हाम्रा ऐक्यबद्ध सुझाव र मागहरूः

१) मुलुकमा सुशासनको स्थापना जेनजी प्रदर्शनको मुलतः मुख्य माग थियो l नेपाली कांग्रेसले आफैभित्र पनि `आन्तरिक सुशासन आयोग´ गठन गरोस् l जसले तिनै तहको सरकारमा गएका प्रतिनिधिको विगतका प्रवृत्ति समीक्षासँगै भविष्यमा जाने प्रतिनिधिको भूमिकालाई निश्चित मापदण्डका आधारमा अनुगमन गरेर, प्रोत्साहन, चेतावनी र कारबाही सिफारिस गर्न सकोस्l

२) नेपाली कांग्रेसले भदौ २३ गते नयाँ बानेश्वरको प्रदर्शनमा अत्याधिक बल प्रयोगको घटनाको गहिरो छानबिन र दोषीलाई कडा कारबाही गर्ने भनि गरिसकेको निर्णयमा प्रष्ट ढंगले पार्टी उभियोस्l

३) भदौ २४ गते जेनजीको प्रदर्शनमा घुसपैठ गर्दै देशव्यापी रुपमा भएको तोडफोड र आगजनीमा सामेल जो कोही हुन् , दोषीलाई कारबाहीको दायरामा ल्याइनु पर्छl यसो गर्नु भनेको, ‘निर्दोषलाई आरोपबाट मुक्तिको अवसर हो’ भनेर बुझाउन जरुरी छ। त्यो बुझाऔंl

४) भ्रष्टाचारका हरेक प्रकरणको गहिराइमा गएर निष्पक्ष छानबिन गर्न कांग्रेसको प्रष्ट प्रतिबद्धता र सहयोग रहनुपर्दछl

५) नियमित या बिशेष महाधिवेशन अविलम्ब आयोजना गरेर परम्परागत राजनीतिक दलबाट आधुनिक दलका रूपमा नयाँ उर्जाका साथ अघि बढ्ने रोड म्याप नेपाली काँग्रेसले सार्वजनिक गर्नुपर्छl

६) कांग्रेस पार्टीको यौवन फर्काउन- आसन्न केन्द्रीय समितिको बैठकले बिधानमा संशोधनको ढोका खोलेर पार्टीको सबै तहमा प्रतिष्पर्धा मार्फत हाम्रो जेनजी उमेर समूहको प्रतिनिधित्व सुनिश्चित गराउने प्रावधान व्यवस्था गरिनुपर्छl

७) फागुन २१ मा तोकिएको प्रतिनिधिसभा निर्वाचनलाई सुनिश्चित बनाउने र निर्वाचन मार्फत लोकतान्त्रिक संविधानलाई सहज मार्गमा अघि बढाउने कार्यमा नेपाली काँग्रेस अग्रसर हुनुपर्दछl

८) जेनजी आन्दोलनको ताजा हुटहुटीलाई संस्थागत गर्दै फागुन २१ को निर्वाचनलाई मतदान संख्याका हिसाबले ऐतिहासिक निर्वाचन सुनिश्चित गर्न कांग्रेसले नवयुवा तथा आम नागरिकहरुलाई मतदाता दर्ता गराउनका निमित्त 'Vote Ready Nepal' अभियान सञ्चालन गर्ने निर्णय गरोस्।

९) कांग्रेसमा नवयुवा जोड्ने नर्सरीका रूपमा रहेका नेपाल विद्यार्थी संघ लगायतका भातृ संस्थाहरूलाई पुनःपरिकल्पना र पुनःसंरचना गर्न अपरिहार्य छ। यस विषयमा यथेष्ट छलफल गरी आवश्यक अध्ययनका लागि कार्यदल गठन गर्न विनम्र अनुरोध गर्दछाैं।

हामी #GenZfor7D को मान्यतामा भिन्न पहिचान, विश्वास र अभियानमा अग्रसर भएका छौंl Dignity, Dedication, Democracy, Discipline, Digital Transformation, Delivery and Development सम्बन्धि हामी हाम्रा अभिमत क्रमशः सार्वजनिक गर्दै जानेछौं l आजको मितिमा सबै दल, सबै संस्था, सबै पुस्ता र सिंगो नेपालका लागि यो ९ सुत्रीय साझा मार्ग र साझा गन्तव्य बन्नसक्दछ भन्नेमा हामी विश्वस्त छौंl

विकल राई, खोटाङ, २५
साजन योञ्जन, सिन्धुपाल्चोक, २६
विनोद राज जोशी, दार्चुला, २५
करुणा कटुवाल, धनकुटा, २५
श्रीकृष्ण भट्टराई, रुपन्देहि, २८
दिनेश चौधरी, बर्दिया, २८
मनोज पुरी, काठमाडौं, २६
मञ्जु विश्वकर्मा, कपिल्वस्तु, २७
करिना पुरी, सिन्धुपाल्चोक, २३
सिर्जना स्नेही, बझाङ, २६
गौरव पाण्डे, बारा, २२
मुना नेपाली, पाँचथर, २६
विजय पुन मगर, जाजरकोट, २६
किरण तिवारी, रुपन्देही, २७
नीलम कार्की, झापा, २५
सन्तोष भण्डारी, गुल्मी, २४
आशा नामजाली मगर, कैलाली, २४
दिपेन धिमाल, झापा, २७
सुशील गोदार, कास्की, २६