अमेरिकी राष्ट्रपति डोनाल्ड ट्रम्पले चीनसँगको नयाँ व्यापार तनावलाई कम गर्न तयार रहेको संकेत दिएका छन्।
ट्रम्पले आफ्नो सामाजिक सञ्जाल ट्रुथ सोसलमा एक विज्ञप्ति पोस्ट गर्दै चिनियाँ समकक्षी सी चिनफिङलाई तनाव कम गर्न सजिलो पारेका छन्।
‘चीनको चिन्ता नगर्नुहोस्, सबै ठीक हुनेछ! अत्यन्तै सम्मानित राष्ट्रपति सीका लागि भर्खरै एउटा नराम्रो क्षण थियो। उहाँ आफ्नो देशका लागि आर्थिक मन्दी चाहनुहुन्न, र म पनि चाहन्न। अमेरिका चीनलाई सहयोग गर्न चाहन्छ, चोट पुर्याउन होइन,’ ट्रम्पले लेखेका छन्।
त्यसअघि अमेरिकाका उपराष्ट्रपति जेडी भान्सले पनि चीनलाई विवेकको बाटो रोज्न आह्वान गरेका थिए। दुई देशबीचको व्यापार युद्ध लम्बियो भने ट्रम्पको हात माथि हुने दाबी गरेका थिए।
चीनले दुर्लभ खनिज पदार्थको निर्यातमा गत हप्ता फेरि कडाइ गरे पछि अमेरिका र चीनबीच फेरि तनाव बढेको थियो। यस पटकको व्यापार युद्धमा दुर्लभ खनिज पदार्थको हतियार प्रयोग गरेर ट्रम्पलाई झुकाएको चीनले अहिले फेरि कडाइ गरेको हो।
सुरूमा दुर्लभ खनिज पदार्थको निर्यातमा मात्रै चीनले रोक लगाएको थियो। अहिले भने केही चिनियाँ दुर्लभ खनिज पदार्थ प्रयोग गरेर अरू देशमा बनाएको सामान निर्यात गर्नका लागि पनि चीनको वाणिज्य मन्त्रालयसँग स्वीकृति लिनु पर्ने नियम ल्याएको छ।
चीनको वाणिज्य मन्त्रालयले बिहीबार एक विज्ञप्ति जारी गर्दै त्यस्तो घोषणा गरेको हो। सो विज्ञप्तिले चीनको राष्ट्रिय सुरक्षा र हितको रक्षाका लागि चिनियाँ दुर्लभ खनिज पदार्थ प्रयोग गरेर बनाएको सामान निर्यात गर्न मन्त्रालयबाट निर्यात इजाजतपत्र प्राप्त गर्नुपर्ने भनेको थियो।
त्यसपछि ट्रम्पले चीनबाट आउने सामानमा थप १०० प्रतिशत भन्सार लगाउने धम्की दिएका थिए। त्यसको जबाफमा चीनको वाणिज्य मन्त्रालयले आइतबार अमेरिकाले उच्च भन्सार महसुलको धम्की दिन रोक्नुपर्ने भन्दै बाँकी रहेका व्यापारिक मुद्दाहरू समाधान गर्न थप वार्ताका लागि आग्रह गरेको थियो।
‘हरेक मोडमा उच्च महसुलको धम्की दिनु चीनसँग मेलमिलाप गर्ने सही तरिका होइन। यदि अमेरिका आफ्नो बाटोमा लागिरहन्छ भने चीनले आफ्नो वैधानिक अधिकार र हितहरूको रक्षा गर्न दृढताका साथ उचित कदम चाल्नेछ,’ मन्त्रालयले भनेको थियो।
त्यसपछि ट्रम्प र भान्सले तनाव कम गर्ने संकेत गरेका हुन्। ट्रम्प र सीको भेट भन्दा अघि चीनले दुर्लभ खनिज पदार्थको निर्यातमा कडाइ गरेर तनाब बढाएको हो।
दोस्रो कार्यकालको सुरूमै चीनसँग व्यापार युद्ध थालेका ट्रम्प पछिल्लो समय सीसँग भेटेर सम्झौता गर्न आतुर छन्। त्यसै क्रममा दुई नेताले दक्षिण कोरियामा अक्टोबरको अन्त्यमा हुने एसिया प्यासिफिक इकोनोमिक कोअपरेसन फोरमको शिखर सम्मेलनमा भेट्ने तय भएको छ।
चीनले दुर्लभ खनिज पदार्थको निर्यातमा कडाइ गरेपछि ट्रम्पले सीसँग भेट्नुको अर्थ नहुने भनेर टिप्पणि गरेका थिए। केही महिनाअघि सिकागोस्थित फोर्ड मोटर कम्पनीको कारखानामा दुर्लभ खनिज प्रयोग गरेर बनाइने चुम्बक अभावमा काम रोकिएको थियो।
अमेरिकामा रहेका अरू मोटर कम्पनीको कारखानामा पनि काम रोकिने खतरा भएपछि ट्रम्पले पहल गरेर जुन ५ मा चिनियाँ राष्ट्रपति सीसँग ९० मिनेट टेलिफोन कुराकानी भएको थियो।
त्यसपछि कैयौं चरणको वार्त पछि दुई देश सहमति नजिक पुगेका छन् भने ट्रम्पले लगातार सीसँग भेट्न प्रयास गरिरहेका छन्। यस्तोमा दक्षिण कोरियामा ट्रम्प र सीबीच भेट हुनु अघि चीनले दुर्लभ खनिज पदार्थको निर्यातमा फेरि कडाइ गरेपछि सो भेट नहुने कि जस्तो देखिएको थियो।
तर ट्रम्पको पछिल्लो टिप्पणी पछि उनले तनाव कम गर्न सीलाई भेट्ने संभावना जिवितै रहेको देखिएको छ।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
1635339834.jpeg)
-1756794700.JPG)
-1746009348.jpg)
