नेकपा एमालेमा अहिले नै अध्यक्ष केपी शर्मा ओलीले नेतृत्व छाड्नुपर्छ भनेर धारणा राख्नेहरू कम छन्।
बुधबार र बिहीबारको केन्द्रीय समितिमा धारणा राखेका अधिकांश केन्द्रीय सदस्यहरूले अध्यक्ष ओलीलाई महाधिवेशनसम्म काम गर्न दिनुपर्ने धारणा राखेका छन्।
अध्यक्ष ओलीले मंसिर अन्तिम साता पोखरामा ११ औं महाधिवेशन गर्न प्रस्ताव गरेका छन्। हिजो र आज बोलेका अधिकांश केन्द्रीय सदस्यहरू मंसिरमा हुने महाधिवेशनबाट भने अध्यक्षमा ओली आउन नहुनेमा छन्।
केन्द्रीय सदस्य सुरेन्द्र मानन्धरले अध्यक्षबाट केपी शर्मा ओलीले राजीनामा दिनुपर्ने बताए। यसरी अध्यक्ष ओलीको राजीनामा शब्द नै प्रयोग गरेर बोल्नेहरू मुश्किलले १० जना केन्द्रीय सदस्यमात्रै पुगेका छन्।
पार्टी र मुलुक असजिलो अवस्थामा रहेको भन्दै धारणा राखेका अधिकांश केन्द्रीय सदस्यहरू मंसिरसम्म ओलीलाई नेतृत्वमै राख्नुपर्ने पक्षमा देखिएका छन्।
प्रचार विभाग प्रमुख राजेन्द्र गौतमका अनुसार बुधबार ५० जना र बिहीबार १३४ जनाले धारणा राखेका छन्। बुधबार ओलीका विपक्षमा कम केन्द्रीय सदस्यहरू बोले भने बिहीबार उनको आलोचना गर्नेहरू केही बढेका छन्।
केन्द्रीय सदस्यहरूलाई बोल्न ३ मिनेटका दरले समय दिइएको छ, केही केन्द्रीय सदस्यले त्यो समय अपुग भएको भन्दै लिखित रूपमा पनि धारणा पार्टीमा बुझाएका छन्।
प्रचार विभाग प्रमुख गौतमका अनुसार अहिलेसम्म केन्द्रीय सदस्यहरूले राखेको धारणाअनुसार प्रतिनिधि सभा पुनर्स्थापनाको पक्षमा बोल्नेहरू धेरै छन्। प्रतिनिधि सभा पुनर्स्थापना मागलाई पार्टीले निर्णय गरेर जानुपर्नेमा धेरै केन्द्रीय सदस्य रहेको उनले बताए।
संविधान पक्षधर शक्तिहरूसँग परामर्श गरी अघि बढ्न पनि केन्द्रीय सदस्यहरूले सुझाव दिएका छन्।
1635339834.jpeg)
-1746009348.jpg)
