नेकपा (एमाले) केन्द्रीय सदस्य टंक कार्कीले जेनजी आन्दोलन कोत र भण्डारखालपछिको सबैभन्दा ठूलो पर्व भएको टिप्पणी गरेका छन्।
बिहीबार केन्द्रीय कमिटी बैठकमा अध्यक्ष केपी शर्मा ओलीको राजनीतिक प्रतिवेदनमाथि धारणा राख्ने क्रममा उनले एमाले राष्ट्रिय संकटको अवस्थामा रहेको चित्रण गरेका छन्।
‘हामी अहिले राष्ट्रिय संकटमा छौं। वाम आन्दोलन, विशेष गरी एमाले माथिको चुनौती बढेको छ। यो जेनजीको नाममा भएको कोतपर्व भण्डारखाल पर्वपछिको सबैभन्दा ठूलो पर्व हो। यो विध्वंशकारी पर्व हो,’ उनले भने।
यसमा चार शक्तिको संलग्नता रहेको उनले जिकिर गरेका छन्।
‘यसमा पुनरूत्थानवादी, सत्ता ढालेर सत्तासीन हुन आतुर शक्ति र दुई चाहिँ बाह्य छन्। बाह्य शक्तिका आआफ्नै रणनीति र लक्ष्य छन्। हाम्रो भूराजनीति, रणनीतिलाई आफ्नो पक्षमा पार्न बाह्य शक्तिको हस्तक्षेप छ। यसमा योजनावद्ध रूपमा प्रायोजित ढंगले प्रवेश भएको हो यसबाट हाम्रो राष्ट्रिय स्वाधिनता, सार्वभौमिकता र भौगोलिक अखण्डतामा चुनौती थपिन सक्छ,’ उनले भने।
जे भयो त्यो आकस्मिक रहेको पनि उनले बताएका थिए।
तर त्यसलाई पूर्वामान गर्नमा कमी रहेको उनको भनाइ थियो।
‘यो जिम्मेवारीबाट नेतृत्व उम्किन सक्दैन। विदेश नीतिमा हामी सन्तुलित र राष्ट्रवादी रहे पनि प्रधान अन्तरविरोध खुट्याउन हामीले नसकेकै हो,’ उनले भने।
केन्द्रीय सदस्य कार्कीले राष्ट्रिय संकटको मोचनका लागि राष्ट्रिय सहमति आवश्यक रहेको बताए। उनले सर्तसहित चुनाव र प्रतिनिधि सभा पुनस्थापनामा विकल्प खुला राख्न पनि सुझाव दिए।
‘साझा एजेण्डा निर्माणमा संघीय लोकतान्त्रिक गणतन्त्रलाई केन्द्र विन्दु बनाएर साझा कार्यदिशा र एजेण्डा तयार गर्नुपर्छ। स्वतन्त्र, शान्तिपुर्ण र भयरहित चुनावको पक्षमा उभिँदै त्यो हुन न सकेमा प्रतिनिधि सभा पुनःस्थापना सहितको विकल्पमा खुला भएर साझा कार्यदिशा निर्माण गर्नु पर्दछ,’ उनले भने।
यो बेला 'अल आउट वार'को रणनीति अवलम्बन गर्न नहुने पनि धारणा राखे।
‘मित्र शक्ति ठम्याउनु पर्दछ । मित्र शक्तिहरूबीच समाना र भिन्नता दुवै हुन्छ। पहिलोमा प्राथमिकता, दोस्रोलाई गौण बनाएर जानु राम्रो हुन्छ। राष्ट्रिय संकटको बेला विपक्षीसँग पनि घाँटी जोड्न तयार हुनुपर्छ। पहिले आफैभित्र जस्तो कि पूर्व राष्ट्रपति विद्यादेवी भण्डारीको मामिलामा,’ उनले भनेका छन्।
उनले पार्टीको संरचना, संस्था र संस्कृतिमा सुधार ल्याउनुपर्ने खाँचो पनि औंल्याएका थिए।
‘एक युगमा एक दिन एक पटक आउँछ। यस घडीमा उचित निर्णय लिन चुक्नु हुँदैन। अन्यथा अर्को युगभरि नोक्सानी बेहोर्नु पर्ने हुन्छ। राजनीति विज्ञान हो, कला पनि हो,’ उनले भनेका थिए।
1635339834.jpeg)
-1746009348.jpg)
